Исрапилов Дени бераллехь дуьйна вара тамашийна каде, тIах аьлла хьийзаш. Школе вахале карадирзира цунна хелха валар, илли алар. 1962-чу шарахь Хьалха-МартантIехь дуьнен чу ваьлла Дени, 1970-чу шарахь цигарчу №5 йолчу школе деша вахана. Юьхьанцарчу классашкахь дуьйна дIаволало школин исбаьхьаллин коллективехь дакъалаца. Иза кест-кеста вуьгура кIоштан, тIаьхьо республикин берийн конкурсашка, фестивалашка, кхиболчу исбаьхьаллин къовсамашка. Дукха хьолахь хIокхо толам боккхура цигахь. Цундела, дукха тамашийна ца хета, школа чекхъяьккхинчул тIаьхьа Исрапилов Денига Хьалха-МартантIерчу кIоштан Культурин цIийне балха кхайкхар. Шен хьаналчу къинхьегаман некъ дIаболалуш хIара Берийн театран режиссер вара. Хьалха-МартантIерчу Культурин цIийнехь кхиъна догIучу берашца цхьацца спектаклаш хIиттайора Денис, юкъ-кара ша дакъалоцура, воккхо артист оьшуш меттиг нисъелча. ХХ-чу бIешеран 80-чу шерийн юьххьехь Iаламат дика дIахIоттийнера Денис кхиазхошца беш болу болх. Амма 1984-чу шарахь, кхиболчу шен нийсархойн санна эскаре гIуллакх дан ваха дийзира кхуьнан. Даймахкана декхар дIалуш хиллачу оцу шина шарахь чIогIа сагатдора Денис ша Iуналла деш хиллачу берашна. Сих-сиха гIенах гора цунна шаьш хIиттийна хилла спектаклаш. ЧIогIа лаьара и мехала болх кхин а дIакхехьа. 1986-чу шарахь эскарера цIавоьрзий, ондачу дегаайамца карлабоккху цо безаш ша тIелаьцна болх. Еккъа берийн спектаклаш хIиттийна Iаш вацара Дени. Лаккхарчу тIегIанехь дIахьора цо кегийрхошца кхетош-кхиоран болх а. Дуьйцура нохчийн къоман синбIаьвнех. БIешерийн кIоргенера таханене кхаччалц дайша лардеш схьадеанчу гIиллакх-оьздангаллех, хIорангахь хила догIучу ийманах. Балхах, и бахьанехь баьхначу бIаьрлачу кхиамех Исрапилов Дени Iехавеллачу муьрехь, вайн махка инзаре буьрса тIемаш хьаьвзира. Цкъачунна бита дийзира шена дукхабеза болх. Амма, къизачу тIеман луьста кхийсарш нилха йовлушшехь, Дени сихонца аравелира шена дукхабезачу балха. Цкъачунна некъаш маьрша ца хиларна, бераш схьагулдина Берийн театран болх карлабаккха-м ца хIоьттира иза. Хьалха-МартантIерчу Культурин цIийнехь хIинца цуьнга кховдина болх –аккомпаниатор бара, Дени пондар лакха хууш хилар тидаме эцна. Дечиг-пондар, кехат пондар цхьабосса дика говза локху кхо. Амма массо а хIуманал дика Денина карайирзинарг эстрадехь иза къамелан жанр ю. Дукха хьолахь Хьалха-Мартан кIоштахь хуьлучу концерташкахь забаре дийцарш дуьйцу цо. КIезиг дац Исрапилов Денин репертуарехь, Дала декъала войла иза, Нохч-ГIалгIайн халкъан артистан Эдисултанов ШитIин репертуарера дийцарш. Хаза, говза дуьйцу Денис и дийцарш. Хьовсархойн Iаламат самукъадолу царах. Вайн махкара тIемаш дIабирзинчул тIаьхьа, балхана юкъах ца волуш, Соьлжа-ГIалара искусствон колледж чекхъяьккхира Денис. Деша цкъа а тIаьхьа доций хууш, хIинца Нохчийн Республикин университетехь доьшуш ву иза, шен дагна дукхаеза актерийн говзалла кхачам боллуш караерзо Iалашо лаьцна. Шеко яц Исрапилов Дени цу Iалашоне кхочург хиларх. 2013-чу шеран чаккхенехь «Даймохк» телеканало дIаяьхьначу «Даймехкан забарш» цIе йолчу республикин конкурсехь шолгIа меттиг яьккхира похIма долчу артиста. Хьалхара меттиг, кинон а, театран а актер волчу Исламов Султанна кхечира. Ишттачу говзанчашца къовсавала хьуьнар, доьналла Денехь хиларо гойту корматаллин лакхарчу тIегIане цуьнан говзалла кхаьчна хилар. Махкана, халкъана мерза кхаъ хир бу аьлла хета, еххачу хенахь «йокъа лаьттинчу» къамелан жанрин хьаьттахь, доккха хиндерг долу забарча гучуваларх.
Г.АРАПХАНОВА
№ 69, шинара, 23 июнь, 2015 шо