Хьиджратан 1444-чу шарца бусалбанаш декъалбина Нохчийн Республикин Куьйгалхочо Кадыров Ахьмад-Хьаьжин Рамзана.
Цо карладаьккхина хьиджратан мур Мухьаммад Пайхамар (Делера салам-маршалла хуьлда цунна) Сийлахьчу Маккара Нуьречу Мадинате дӀакхалхарца дуьйна бух болуш хилар.
Бусалбанийн рузманца долу Керла шо билгалдаккхар дуьйцуш, Делах кхерарехь а, Цунна Ӏамалш йарехь а, вовшашца болу барт чӀагӀбарехь а бусалбанаша жигаралла гайта йезаш хиларна тӀе тидам бахийтина Нохчийчоьнан Куьйгалхочо.
«… ХӀокху деношкахь, дика а, вуон а луьра къийсалуш а долуш, оцу къийсамехь шайн синош дӀалуш вайн кӀентий а болуш, вайна къаьсттина чӀогӀа оьшуш ду иза. Вайн кӀенташна гӀо-орца а, сихонца толам а бехалаш шайн доӀанашкахь», — билгалдаьккхина Нохчийчоьнан Куьйгалхочо.
Иштта, шен кост дерзош, бусалбанаш декъалбаран дешнаш а далийна Кадыров Рамзана: «Керлачу шаро кхин а дукха хазахетарш а, толамаш а, турпалхой а, бакъонан къаной а, Даймахкана муьтӀахь а, беркате а болу нах а лойла вайна».