Йуьртан бахаман дакъа кхиорехь а, кхиарехь а вайн махкахь баккхий гайтамаш хилар билгалдаьккхина Кадыров Рамзана.
Республикин Куьйгалхочо дийцарехь, куьйгаллехь Закриев ИбрахӀим а волуш, Нохчийчоьнан йуьртан бахаман министерствос эвсаре болх баро Нохчийчуьра агропромышленностан комплекс керлачу тӀегӀане йаьккхина.
Иштта, йалташ дӀадеран майданаш а 303 эзар га бараме йаьхна, йеш 50 эзар тонна бараман элеватор а йу.
Цул сов, йуьртабахаман сурсаташца доьзна гӀуллакх а, цуьнца йоьзна долахойн бизнес-проекташ а кхуьуш хиларна тӀе а тидам бахийтина Кадыров Рамзана.
«Чуьрчу а, арарчу а рынкашкахь йоккха хьашто йолуш ду нохчийн сурсаташ«, — йаздина цо.
Даханчу шарахь шен болх дӀаболийна а, йуьртан бахаман декъехь къахьоьгучарна шех доккха гӀо-накъосталла хилла а машинийн-технологийн «Стандарт-С» компанин болх а хастийна Нохчийчоьнан Куьйгалхочо.