Мухьаммад Пайхамаран ﷺ дахар довзийтаран «Сахьихь аль-Бухари» жайнин цхьа гоч экстремизман материалийн федеральни могӀаре тохаран хьокъехь дӀахьедар Нохчийн Республикин Парламентан спикера Даудов Мохьмада а дина.
Цо билгалдаккхарехь, оцу хаамна чӀогӀа реза боцуш, дарбелла бу Россера бусалбанаш, хӀунда аьлча, Сийлахь Къуръан дӀадаьлча, шега болчу ларамца 2-чу меттехь лаьтташ ду и жайна.
И гӀуллакх пачхьалкхан куьйгалло а, Президентан администрацис а тесна дуьтург хилар ца хета шена аьлла, Нохчийчоьнан Куьйгалхочун Кадыров Рамзанан а, суьдан кхиэл йемалйаран хьокъехь долу Нохчийчоьнан Муфтин Межиев Салахь-Хьаьжин а дӀахьедарш къобалдар а хаийтина Даудов Мохьмада.
«Оха, Нохчийн Республикин Парламентан депутаташа, цхьабосса къобалдо Нохчийчоьнан Куьйгалхочун Кадыров Рамзанан а, Нохчийчоьнан Муфтин Межиев Салахь-Хьаьжин а дӀахьедарш. «Сахьихь аль-Бухари» жайнин гоч экстремизман материалийн федеральни могӀаре тохаран хьокъехь болу суьдан сацам, хьокъала болччу Ӏеламнахах пайда а оьцуш, йухаталла безаш бу«, — билгалдаьккхина цо.
Иштта, оцу декъехь нийсо а, бакъо а толорхьама оьшшу гӀулчаш Нохчийн Республикин Парламента йохург хилар а дӀакхайкхийна Даудов Мохьмада.