«Иблисан пачхьалкхерчу» террористаша стомара эккхийтира Шемарчу ширачу Пальмирера еза меттиг. Масех де хьалха дIахьедира оцу зуламдайша шаьш цига минаш ехкина хилар а, и меттигаш лоьлхуьйтург хилар а.
***
Йовхо тIех Iаткъар бахьанехь ялх бIе сов стаг кхелхина Пакистанехь. Цигарчу бахархоша боккха бала хьоьгу хи ца тоарца, сих-сиха электроэнерги дIаяккхарца доьзна.
***
Пентагонан куьйгалхочо бечу хаамашца США кийча ю Европин пачхьалкхашкахь шен 250 танк а, БТР а, кхийолу еза техника а дIахIотто.
***
Францерчу морякаша забастовка йира кху деношкахь. Цара Ла-Манш бухалара тоннель дIакъевлира. И бахьанехь бIеннаш машенаш, иттаннаш цIерпошташ дIасадаха аьтто боцуш дисира.
***
Эрмалойчоьнан бахархоша Ереванехь йоккха митинг дIаяьхьира. Цара дIахьедора электроэнергин тарифаш 16 процентана лакхаяхарна шаьш реза цахилар. Урамашка бевллачарна юккъера уггаре а карзахе хьийза 300 сов стаг полицис дIалецира.
***
Украинин Iедалан эскарша цхьа а де ца долуьйту Донецкан а, Луганскан а республикашкарчу гIаланашна, ярташна даккхий герзаш ца детташ. Стомара маьрша ши стаг велла и бахьанехь.
***
Парижехь дIахьур ду «нормандски четверкин» кхечу мехкийн гIуллакхашкахула болчу министрийн цхьаьнакхетар. Цара дийцаре дийр ду Украинера хьал.
***
КНДР-н спикерца цхьаьнакхийтира кху деношкахь Россин Федеральни Собранин Федерацин Советан Председатель В.Матвеенко а, Пачхьалкхан Думин Председатель С.Нарышкин а.
***
Россин Юкъараллин Палатин юбилейни (уьтталгIачу) пленарни заседанехь дакъа а лецира, къамел а дира вайн мехкан Президента В.Путина.
***
Вайн мехкан Премьер-министра Д.Медведевс Петрозаводскехь дIаяьхьначу кхеташонехь дийцаре дира оцу регионехь йолчу ярташка газ ялорна кечамбаран хьокъехь долу гIуллакхаш.
***
Россин энергетикин министерствехь бечу хаамашца карарчу шарахь вайн махкахь мехкадаьтта даккхар 3 миллион тоннана алсамдала тарло.