Иракан къилбаседа-малхбалехь теракт йина. Оцу бохамехь 14 стаг кхелхина, лаххара а 20 стагана чевнаш хилла.
***
Шемарчу Кобани а, цхьамогIа кхечу гIаланашкахь а, ярташкахь а луьра тIемаш хилира Iедалан эскаршна а, «иблисан пачхьалкхан» гIеранашна а юкъахь. Шина а агIор иттаннаш байъинарш а, чевнаш хилларш а бу.
***
Пакистанехь тIех йовха ю. Масала, Карачи гIалахь йовхо 48 градус хьалаяьллера. И бахьанехь махкахь цхьа эзар гергга стаг кхелхина. Кхин оццул нах больницашкахь а бу.
***
Африкан пачхьалкхашкара хIара шо доладелчахьана Европин мехкашка схьакхелхина ворхI эзар гергга мигрант. Царах доккхах долу дакъа Италехь сецна.
***
ТIаьхьарчу деношкахь Францехь дIайоьлхуш митингаш ю. Масех де хьалха урамашка арабевлларш морякаш хиллехь, тахана Парижан а, Тулузан а, кхечу шахьарийн а урамашкахь митингаш еш таксисташ бу.
***
Эрмалойчохь а кIирнах гергга лаьттира электроэнергин тарифаш лакхаяхарна резабоцучара йина митинг. Хетарехь, Iедална дIахезна халкъан «аз».
***
Евросоюзо юха а тIечIагIдина Донецкерчу а, Луганскерчу а цхьайолчу районашна шатайпа статус яла езаш хилар.
***
Украинин Президента П.Порошенкос куьг яздина кхечу пачхьалкхийн эскаршна Украине чудахка бакъо луш долчу указна.
***
НАТО-с шен ницкъаш Европехь алсамбахаре хьаьжжина, царна дуьхьал дан хьакъ доллу гIуллакхаш дийр ду Россехь. Иштта дIахьедар дина мехкан оборонан министерствехь.
***
Россин Президента В.Путина куьг яздина Евросоюзан а, Малхбузенан а пачхьалкхашна дуьхьал санкцеш яран хьокъехь долчу Указна. Евросоюзо санна цхьана шарна йина и санкцеш.
***
Омск областехь тIекIал шиъ некъан-транспортан бохам хилла. Оцу бохамашкахь 23 стаг кхелхина. 11 стаг чIогIа лазийна.
***
ГIалгIайчохь леррина операци дIахьош гучу а ваьлла хIаллаквина дуьненаюкъарчу терроризман ши декъашхо. Цхьаьннан гIодаюккъе бихкина эккхаш болу гIирс хилла. Амма иза эккхийта ца ларийна зуламхо.
№ 71, шот, 27 июнь, 2015 шо