Мохкбегоро зенаш динчу шемахошна а, туркошна а гуманитарин 160 тонна сов гӀо-орца хьажийна Нохчийн Республикера.
Оцу белхан могӀарера ду Кадыров Ахьмад-Хьаьжин цӀарахчу Соьлжа-ГӀалин дуьненайукъарчу аэропортера рогӀера 2 кема дахар а.
Шемарчу Латакия гӀала дахана и шиъ.
Меттигерчу бахархошна лерина гуманитарин и гӀо-орца (62 тонна) вовшахтоьхна Кадыров Ахьмад-Хьаьжин цӀарахчу Йукъараллин фондо, шеца цхьаьна гӀоьналлин «Хайра» йукъаралла а йолуш.
Йовха хӀуманаш (божарийн, зударийн, берийн духарш, и.д.кх.а) а, берийн даарш а, токан генераторш а, серлотохаран гӀирсаш а, гоьнаш а, гӀайбанаш а, йургӀанаш а ду цунна йукъадогӀуш.