Зударийн дуьненайукъарчу денца нохчийн наной а, йижарий а, йоӀарий а, хӀусамнаной а декъалбина Кадыров Ахьмад-Хьаьжин Рамзана.
«Шу а, шун доьзалш а ирсе, могаш-маьрша хуьлийла, беркатца дехийла лаьа суна«, — йаздина цо.
Нохчийн Республикин Мехк-Дас билгал ма-даккхара, цара къахьоьгу хӀусамашкахь кхерч ларбеш, берашлахь дикалла а, къинхетам а, синмехаллаш а йаржош, дине а, Даймахке а, культуре а церан безам кхоллаболуьйтуш.
«Цуьнца цхьаьна, социальни а, экономикин а декъехь мохк кхиорна йукъахь а доккха дакъалоцу аш, йукъараллин а, политикин а дакъошкахь жигаралла а гойту«, — тӀетоьхна Кадыров Ахьмад-Хьаьжин Рамзана.
Иштта, нохчийн зударийн хьокъехь дуьйцуш, шайна а, шайн доьзалшна а, халкъана а тӀе муьлхха а бала хӀоттарх а, уьш доьналлах цабохарна, турпалалла гайтарна тӀе тидам а бахийтина цо.
«Даймахкана тешаме а, муьтӀахь а болу кӀентий цара кхиорна, вайн дикачу, собаречу, къинхетамечу, хьекъалечу наношна доккха баркалла ала лаьа суна!«, — билгалдаьккхина Нохчийчоьнан Мехк-Дас.