Нохчийн Республикехь дуьненайукъарчу терроризмаца къийсам латторехь кхелхинчу нохчийн бакъонашларйархойн доьзалшна ахчанца гӀо-накъосталла дина Кадыров Ахьмад-Хьаьжин цӀарахчу Йукъараллин фондо.
Оцу доьзалшна и ахчанаш дӀадаларехь дакъалаьцна Нохчийн Республикин Мехк-Ден гӀоьнчас — берийн а, кегийрхойн а «Движение первых» боламан Республикерчу декъан Кхеташонан куьйгалхочо Кадыров Ахьмада.
Telegram чуьрчу шен каналехь оцу хьокъехь хаам бина Кадыров Рамзана.
Цо билгал ма-даккхара, бакъдуьнена бирзинчу вежарийн доьзалшна гIо-накъосталла латтор — дуьххьалдӀа долу вайн декхар ду.
Нохчийн халкъан ирсечу кханенан дуьхьа цара шайн догӀмаш а, синош а дӀаделла хиларна тӀе тидам а бахийтина республикин Мехк-Дас.
«Церан доьзалийн хьашташ кхочушдийр ду вай даима а. Мел оьшург церан хилийтарехь къахьоьгур ду вай. Вайн сийлахь декхар ду иза«, — йаздина Кадыров Рамзана.