Берийн библиотекехь уггаре хьоме хьеший, кхеташ ма-хиллара, бераш ду. С.В.Михалковн ц1арахчу республикански берийн библиотекехь массо а хенахь хазахетарца т1еоьцу уьш, цул сов церан самукъадаккха конкурсаш вовшах а етта, иштта уьш цхьацца ловзарех ловза а ловзуьйту. Библиотеки чохь 2 ешаран зал ю, хьалхарчу зала чохь книгаш йоьшу 1-чу классера 5-чу классе кхаччалц болчу дешархоша. Цу чохь берашна оьшучуьнга хьожуш, болх беш ю библиотекарь Гацаева Фатима. Шолг1ачу зала чохь 6-чу классера 11-чу классе кхаччалц болу дешархой хуьлу. Царна еза книгаш царна кхачо г1ерташ, цу зала чохь къахьоьгуш ю библиотекарь Дудаева Хьава. Берийн библиотекин болх иштта д1ах1отторна т1ехь сема 1уналла латтош директор Сайдумова Зулай ю.
Берашна библиотеки чохь уггаре хазахеташ цхьа чоь ю, цуьнан ц1е а ю берийн ойла т1ейохуьйтур йолуш хаза. Иза «Туьйранийн чоь» аьлла ю. Цу чохь туьйранаш деша а, парг1ат ловза а йиш ю кегийчу ешархойн. Бераш мультикашка а, берийн туьйранашка а хьовсу, «Гаьнгали» ц1е йолу передача къаьсттина хазахета берашна. Оцу проектан автор берийн библиотекин директор Сайдумова Зулай ю. Передачи юкъахь виъ турпалхо ву: Маьлх-Аьзни, Ч1ирдиг, Майршок, Туьйр-туьйр-туьйранча. Передачехь берийн яздархочух лаьцна а дуьйцу, цуьнан туьйра а, байташ а йоьшу. Билгалдаккха лаьа и ролаш ловзош болу «актераш» библиотекин ешархой хилар. Маьлх-Аьзни Соьлжа-Г1аларчу №18 йолчу школин 6-чу классан дешархо Сайдулаева Раяна ю, «Ч1ирдиг» №61 йолчу школин 6-чу классан дешархо Мунаев Мохьмад ву, «Майршок» №48 йолчу школин 6-чу классан дешархо Сайдумов Ансар ву.
Библиотеки чу дог1учу бераша тайп-тайпана туьйранаш а, книгаш а йоьшу. Дукхахьолахь берашна дезаделла яздархочун Г.Александрован «Домовенок Кузька и волшебные вещи», «Домовенок Кузька и его сундучок» туьйранаш, Л.Н.Толстойн туьйранаш а, байташ а, А.Бартон «Берашна туьйранаш» а. Уггаре хазахеташ дерг – дай-наной шайн берашца цхьаьна библиотеке бахкар ду. Цара шайн берашна книгаш марзъяхь, уьш хьекъале кхуьур а бу, царна цунах боккха пайда а бер бу. Аьхкенан каникулашкахь а библиотекин белхахоша тайп-тайпана конкурсаш ярца самукъадоккху берийн. Масала, «Х1етал-металш» конкурс. И дерриге а берашка дуккха а книгаш ешийта а, царах цаьрга пайдаэцийта а, библиотекарша беш болу болх бу. Х1инца церан боккха лаам бу шайн хилла болу массо а книгашъешархой схьа а гулбина хаза цхьаьнакхетар д1адахьа. Дела реза хуьлда ала лаьа царна, цара вайн т1екхуьуш долу бераш нийсачу новкъа даха г1ерташ къахьегарна.
ЛОРСАНОВА Зарета.
Авторан сурт.