Нохчийн Республикин Мехк-Ден Секретариатан куьйгалхочун гӀовс а, могашалла Ӏалашйаран декъан куратор а йолчу Кадырова Хутмата цхьаьнакхетар дӀадаьхьна А-Хь.Кадыровн цӀарахчу НПУ-н Медицинин институтан директорца Батаев Хизарца.
Институтан балхаца а, студенташ Ӏаморан программашца а, хьехаран гӀуллакх лакхадаккхарца а доьзнарш дийцаре дина цигахь.
Иштта, студенташца цхьаьнакхетарш дӀадахьа Ӏалашо йолуш ша хилар Кадырова Хутмата а хаийтина.
Цул сов, медицинин декъана белхахой кечбаран гӀуллакх шен тергонехь латтор долуш хиларна тӀе тидам а бахийтина цо.
«Вайн Медицинин институт Россехь а йевзаш хилийта, вай Ӏамош а, кечбеш а болу лоьраш шайн балха тӀехь тоьлларш хилийта къахьега дезаш ду«, — дийцина Кадырова Хутмата.