ХӀокху деношкахь вайн махкахь дӀахьош хилла Къилбенан ХӀирийчоьнан культурин денош дӀадирзина.
Омаев Дагунан цӀарахчу Даздарийн цӀийнехь дӀадаьхьна цунна лерина цхьаьнакхетар.
Цигахь дакъалаьцна Нохчийн Республикин Мехк-Дас Кадыров Рамзана а, Къилбенан ХӀирийчоьнан Президента Гаглоев Алана а.
Оцу хьокъехь ша бинчу хаамехь Кадыров Рамзана билгалдаьккхина нохчийн а, хӀирийн а халкъаш шайн дайн мехкашна а, культурашна а муьтӀахь хилар.
«Хьешаша культурин йоккха программа кечйинера. Шайн къоман халхар а, Ӏадаташ а, ламасташ а довзийтира цара«, — йаздина республикин Мехк-Дас.
Цхьаьнакхетар Нохчийн Республикин пачхьалкхан совгӀаташ а, сийлаллин цӀераш а йаларца дӀадирзира.