Кадыров Ахьмад-Хьаьжин Рамзана дӀакхайкхийнчу Нохчийн меттан шеран гурашкахь Къоман политикин, арахьарчу зӀенийн, зорбанан, хаамийн министра Дудаев Ахьмада хӀоттийнчу планаца жигара белхаш дӀахьо «Даймохк» газетан редакцин векалша.
РогӀера болх тахана дӀабаьхьна — иза йара Нохчийн пачхьалкхан хьехархойн университетаца цхьаьна вовшахтоьхна Нохчийн поэзин суьйре.
Соьлжа-ГӀалин гӀашлойн урамех коьрта ларалучу Эсамбаев Махьмудан цӀарахчу бульварехь дӀайаьхьира иза.
Студенташа нохчийн маттахь байташ йийшира, иштта, «Даймохк» газетан 100 шо кхачарна лерина талламан белхаш тӀехь болу киншкаш а, газеташ а дӀасадийкъира.
Цул сов, нохчийн маттаца йоьзна викторина а дӀайаьхьира хьовсархошлахь, нийса жоьпаш деллачарна нохчийн маттахь йолчу киншкашца совгӀаташ а деш.