ТӀеман лерринчу операцехь дакъалоцуш болу нохчийн бӀаьхой украинхойн БПЛА-ш чуэгорехь а жигаралла гойтуш бу.
Telegram чуьрчу шен каналехь оцу хьокъехь хаам бина Кадыров Рамзана.
Россин Федерацин гӀаролан министерствона йукъайогӀучу нохчийн «Запад-АХМАТ» а, «Восток-АХМАТ» а батальонийн а, Курчалойн а, Шуьйтан а кӀоштийн чоьхьарчу гӀуллакхийн отделийн а бӀаьхой бу и белхаш дӀахьош.
ТӀаьххьара цара чуйожийнарг украинхойн цӀейаххана «Фурiя» йу.
Талламан белхаш дӀабахьарехь а, артиллерин тохарш даран майданаш билгалйахарехь а лелош БПЛА йу иза.
2,5 км лекха а йалалуш, пайдаэцаран гуо 50 км а болуш, 200 км дӀайахалуш йу и «Фурiа».
Делахь а, иштта чӀогӀа иза йоллушехь, гуш ма-хиллара, нохчийн бӀаьхоша иза чуйожийна.