Нохчийн Республикин Мехк-Ден Кадыров Рамзанан тӀедилларца а догӀуш, Россин Пачхьалкхан Думин депутата Делимханов Адама Белгородан областан губернаторца Гладков Вячеславца а, ГӀаролан министерствон а, Къоман гвардин а векалшца а цхьаьнакхетар дӀадаьхьна.
Дозанца йолчу кӀошташка мостагӀийн тобанаш сехьайийларца къийсам латторан гӀуллакх дийцаре дина цигахь.
И болх дӀабахьарехь дакъалоцуш Россин гӀаролан министерствон «Запад-АХМАТ» батальон а хир йу.
Telegram чуьрчу шен каналехь оцу хьокъехь хаам бина Кадыров Рамзана.
Цо билгал ма-даккхара, Украинин дозанца йолчу Белгородан областан кӀошташкахь кхерамзалла латторан декъехь дан деза гӀуллакхаш хӀинцале а билгалдаьхна ду.
И болх дӀабахьарехь доккха зеделларг долчу нохчийн бӀаьхоша жигаралла а, эвсаралла а гойтур йу цигахь.