Россин Турпалхочун Кадыров Ахьмад-Хьаьжин цӀарахчу Полицин лерринчу полкан 19 шо кхаьчна.
Оцу хиламца цуьнан буьйранча Чалаев Замид а, белхахой а, ветеранаш а даггара декъалбина Кадыров Рамзана.
Telegram чуьрчу шен каналехь зорбатоьхна Нохчийн Республикин Мехк-Дас и декъалдаран кост.
Цо билгал ма-даккхара, террористашна дуьхьал масех эзар кхиаме операци дӀайаьхьна оцу полко.
Цул сов, вайн махкахь дуьненайукъарчу терроризмаца къийсам латторехь тӀадам хӀоттийнарг а изза полк йу.
Кадыров Рамзана тӀе тидам ма-бахийттара, Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин дӀадолорца кхоьллина йара и полк.
«МаьӀне декхарш дара полкана хьалха хӀиттийна — бахархошна кхерамзалла а, зуламхошца къийсам а латтор«, — йаздина нохчийн Мехк-Дас.
ЦӀейахханчу оцу полкан белхахоша тахана тӀеман лерринчу операцехь дакъалоцуш хилар а хаийтина цо.
«Кадыров Ахьмад-Хьаьжин цӀарахчу Полицин лерринчу полкан белхахой бара вайн эскарийн хьалхарчу зилашкахь Мариуполь мостагӀех паргӀатйаккхаран муьрехь. Иштта, Луганскан а, Донецкан а халкъийн республикашкахь иттаннашкахь йарташ мостагӀех дӀацӀанйина цара«, — тӀетоьхна Кадыров Рамзана.23:08