Пачхьенерчу М.Эсамбаевн бульварехь тахана сарахь дӀайаьхьна нохчийн поэзин а, кхоллараллин а суьйре — ДАЙМЕХКАН АЗ.
Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин 72 шо кхочуш хиларна а, Нохчийн меттан шарна а лерина йара иза.
И беркате, мехала суьйре вовшахтоьхнера НР-н къоман политикин, арахьарчу зӀенийн, зорбанан, хаамийн министерствос, къоман «Даймохк» газето, НР-н Йаздархойн союзо.
Къоначу поэташа шайн байташ а йоьшуш, Нохчийн пачхьалкхан филармонин илланчаша иллеш а олуш, нохчийн мотт а, нохчийн мохк а хестош дӀайаьхьира и суьйре.
Иштта, Нохчийн меттан шо дӀакхайкхоран а, къоман мотт Ӏалашбаран а, кхиоран а декъехь цхьамогӀа гӀуллакхаш а деш, маьӀне къоман политика дӀахьочу Нохчийн Республикин Мехк-Дена Кадыров Ахьмад-Хьаьжин Рамзанна баркалла а элира цигахь гулбеллачара.
Цул сов, мотт а, цуьнца цхьаьна, къоман гӀиллакхаш а, Ӏадаташ а, ламасташ а Ӏалашдар декхар долуш хӀора а нохчи хиларх а дийцира цигахь.