Республикин денца махкахой декъалбина Кадыров Ахьмад-Хьаьжин Рамзана.
Цо тӀе тидам ма-бахийттара, мехкан коьртачу дезденойх цхьаъ ду таханлера дезде.
«Башха де а, башха терахь а ду тахана — вайн халкъ цхьаалла а, барт а болуш хилар гойту хӀокху дийно», — йаздина нохчийн Мехк-Дас.
Иштта, 2002-чу шарахь и дезде дӀакхайкхийнарг Нохчийн Республикин хьалхара Президент, Россин Турпалхо Кадыров Ахьмад-Хьаьжа хилар а хаийтина цо.
«Йукъараллехь цхьаалла хиларо республикин кхиарна беркате Ӏаткъам бийриг хиларх кхеташ вара иза», — тӀетоьхна Кадыров Рамзана.
Цул сов, цхьаалла а, барт а гойтучу нохчийн халкъана даггара баркалла а аьлла цо.
«ТӀейогӀучу хена чохь а вайн кхиамаш хирг хиларан тоьшаллин чӀагӀо йу халкъан цхьаалла. Иштта Ӏалашонаш вай йуьхьарлаьцна а, Кадыров Ахьмад-Хьаьжин командин векалша кхочушйийр йолуш а йу», — дерзийна шен декъалдаран кост Нохчийн Республикин Мехк-Дас.