Кадыров Ахьмад-Хьаьжин Рамзана дӀакхайкхийнчу Нохчийн меттан шеран гурашкахь Къоман политикин, арахьарчу зӀенийн, зорбанан, хаамийн министра Дудаев Ахьмада хӀоттийнчу планаца жигара белхаш дӀахьо «Даймохк» газетан редакцин векалша.
Царах ду муниципалитеташкахь а, тайп-тайпанчу хьукматашкахь а «Нохчийн мотт — къоман са» цхьаьнакхетарш дӀадахьар.
РогӀера цхьаьнакхетар Нохчийн пачхьалкхан хьехархойн университетехь дӀадаьхьна.
Цигахь дакъалаьцна оцу университетан Нохчийн меттан а, литературин а кафедрин студенташа, церан хьехархочо Нинигов Адама.
Къоман «Даймохк» газетан культурин отделан редактора Эльдерханова Зайнапа царна дийцира нохчийн маттаца а, литературица а доьзнарг, ненан мотт Ӏаморехь, Ӏалашбарехь йукъаралло йоху гӀулчаш, йовзийтира «Даймохк» газетан а, нохчийн меттан а, нохчийн къоман а истори.
Иштта, нохчийн журналистикин а, литературин а, къоман йаздархойн а хьокъехь къамелаш а хилира цхьаьнакхетаран дакъалацархойн.
Цул сов, ламасте дирзина ма-хиллара, хаттарш а ца дитира жоьпаш доцуш.