Нохчийн Республикин Мехк-Дас Кадыров Рамзана
дакъалецира хьалха хилла йолу Соьлжа-ГӀалин мехкадаьттан Ӏилманан-талламийн
институтан гӀишло метта а хӀоттийна схьайелларна леринчу хиламехь. Иштта хаам
бира регионан Мехк-Дас телеграмерчу шен каналехь.
1920-чу шарахь хьалайина йолу лакхахь билгалъйаьккхина историн объект меттахӀотто
аьтто белира Нохчийн Республикин хьалхарчу Президентан Кадыров Ахьмад-Хьаьжин цӀарахчу
йукъараллин фондан гӀоьнца.
Цигахь къахьегна белхалой бахьана долуш аьтто хилира цуьнан шатайпа куц-кеп Ӏалашдан.
Цул сов, гуонахара майда а кечйина, сеналла дӀайийна, цхьа бӀе машен дӀахӀотто
майда а йу, иштта, мел оьшуш долу хьелаш а кхоьллина.
Объектан хьалхарчу гӀат тӀехь галерея йу, Соьлжа-ГӀалин тӀамал хьалха а, цул тӀаьхьа
а хилла йолу хенаш а, хиламаш а шена йукъалоцуш йолу. Нохчийчоьнан Мехк-Дас
билгалдаьккхира, Историн шарахь и объект схьайеллар шена дикахеташ хилар.
Кадыров Рамзана баркалла элира Соьлжа-ГӀалин мэрана Кадыров Хас-Мохьмадна а,
иштта, историн объект меттахӀотторан балхана йукъа мел озийначарна а. Цо
билгалдаьккхира, болх лаккхарчу тӀегӀанехь дӀабаьхьна хилар. Иштта Кадыров
Рамзана хаийтира, вайн республикин коьртачу шахьаран хазна а хилла иза дӀахӀуттург
хиларх ша тешна хилар.