ДIадаханчу мукъачу деношкахь Соьлжа-ГIалахь ООО «Кавказ–Экспо» гайтаман компанис Нохчийн Республикин экономикин, мохк кхиоран, махлелоран министерствон а, Нохчийчоьнан юьртан бахаман министерствон а, Соьлжа-ГIалин мэрин а, Нохчийн Республикин махлелоран-промышленностан палатин а, жимачу бизнесан ассоциацин а гIоьнца вовшахтоьхна болу «КавказХалялЭкспо» дуьненаюкъара хьаналчу сурсатийн гайтам дIабаьхьира.
Гайтамехь тайп-тайпана хьаналчу кхачанан сурсаташ а, бусалба нехан духарш а, кхийолу хIуманаш а яра. Республикерчу 15 предприятис шайн тоьлла сурсаташ довзийтира цигахь. Иштта дуьненаюкъарчу гайтамехь дакъалецира Москварчу а, ГIезалойчуьрчу а, Ставрополерчу а, Краснодарерчу а, ГIалгIайчуьрчу а тоьллачу 8 компанис.
Нохчийн Республикин махлелоран-промышленностан палатин вице-президента Баудинов Iийсас дийцарехь гайтаман-ярмаркин коьрта Iалашо яра безачу мархийн баттахь республикерчу бахархошна мелла а дораха сурсаташ хилийтар.
– ХIокху гайтамехь дакъалоцуш тайп-тайпана компанеш ю. Гулделла долчу адамо а гойту кхуьнан мехалла. Муьлххачун а аьтто бу, механа деза а доцуш, тоьлла сурсаташ эца, – бохура цо.
«ASFOUR CRYSTAL» компанис шатайпа продукци еанера ярмарке.
– Тхан компани Россин кхаа гIалахь болх беш ю – Москвахь, Санкт-Петербургехь, Назранехь. Оха тахана кхуза еана хрустальни люстраш, тайп-тайпана сувенираш. Хазахета тхан продукцига адам лерина хьоьжуш хиларна. Тхо тешна ду Нохчийчохь а алссам клиенташ тхан компанин хирг хиларх, – бохура «ASFOUR CRYSTAL» компанин генеральни директоран заместитела Оздоев Микаила.
Гайтаман гурашкахь дIаяьхьира «Молю о жизни» гIо даран акци. И лерина яра онкологин цамгар йолчу нахана гIо дарна.
Р.АБДУЛМУСЛИМОВ
Авторан сурт
№ 79, еара, 16 июль, 2015 шо