
Оцу темина йара Нохчийн Республикин къоман политикин, арахьарчу зIенийн, зорбанан, хаамийн министерствехь «Продвижение безопасности» йерригроссин социальни кампанис дIайаьхьна пресс-конференци. Конференцин Iалашо йара гIашлоша, къаьсттана бераша, некъийн-машенийн кхерамзалла ларйар, Нохчийн Республикин бахархошна некъийн бакъонаш йовзийтар, уьш карлайахар, машенийн некъашца хуьлуш болу бохамаш кIезиг хилийтар.
Пресс-конференцехь дакъалоцуш вара Нохчийн Республикин МВД-н Госавтоинспекцин урхаллин хьакаман заместитель, полицин майор Уматгириев Тамерлан, Нохчийн Республикин транспортан а, зIенийн а, терахьийн а кхиаран министран заместитель Дажаев Ариф, Нохчийн Республикин дешаран а, Iилманан а министран заместитель Усманов Ахьмад, Нохчийн Республикин могашаллаIалашйаран министерствон хьалхара медико-санитарни гIодаран отделан хьаькам Эльдерханова Асет, «Продвижение безопасности» кампанин векалш.
Пресс-конференци дIайолош Уматгириев Тамерлана доцца йовзийтира «Продвижение безопасности» кампани а, церан Iалашо а. Цо билгалдаьккхира гIашлойн кхерамзалла ларйар, къаьсттана бераш лардар, вайн хIораннан а декхар хилар.
«Вайн хIораннан а декхар ду Нохчийн Республикин бахархошна кхерамазалла иза уггар хьалха адамаш вовшашца ларам болуш, гIиллакхе, оьзда хиларна тIера дIадолалуш хилар хаийтар, вайн гIашлойн, къаьсттана берийн кхерамзалла ларйар вайн хIоранна а декхар хилар», – элира Т.Уматгириевс.
Нохчийн Республикехь гIашлойн кхерамзалла ларйаран а, оцу темина Нохчийн Республикехь дIахьочу мероприятеша гIо даран а, цу декъехь берашца цIахь, дай-наноша болх бан безаш хиларан а, иштта цхьамогIа кхечуьнан а хьокъехь тайп-тайпана хаттарш дира пресс-конференцин дакъалацархошка журналисташа.
Пресс-конференци йерзош, Нохчийн Республикехь 2025-чу шеран кхолламан баттера гIуран бутт тIекхаччалц болчу муьрехь хиллачу некъан бохамашкахь маса стаг кхелхина а, лазийна а дийцира.
Оцу шарахь некъан 9 бохам хилла, 5 стаг кхелхина, 4 стаг лазийна.
2026-чу шеран кхолламан баттера асаран бутт тIекхаччалц болчу муьрехь:
3 некъан бохам хилла, кхалхар хилла дац, 3 стаг лазийна.
САГАЕВА Залина