Чекхбели Везачу АллахIа (С.Т.) Мухьаммад Пайхамаран (Делера салам-маршалла хуьлда цунна) умматана совгIатана баийтина, цунах къинхетам беш баийтина болу фарз мархийн шахIру Рамадан. Тахана берриге а бусалбанаш вовшийн марханаш къобалдеш, вовшийн декъалбеш, белабелла, бекхабелла, самукъадаьлла бу. Бакъ а долуш, вайн нохчийн халкъан а уггаре а самукъане деза де ду х1ара.
Марха досту де тIекхачале масех де хьалха дуьйна а «Даймохк» газетан редакце кехаташ, декъалдарш оьхура вайн халкъ, берриге а бусалбанаш марха достучу денца декъалбар доьхуш, церан марханаш къобалдар доьхуш. Царна юкъахь дара Нохчийн Республикин Куьйгалхочун, Правительствон Администрацин динан а, юкъараллин а организацешца зIенаш латторан департаментан, Нохчийн Республикин бусалбанийн динан урхаллин (муфтиятан), цхьамогIа министерствийн а, ведомствийн а декъалдарш.
Царна тIехь билгалдоккхура: «Сийлахьчу Рамадан батто вайн дегнаш, синош цIанди, вайгахь къинхетаман ойланаш кхоьлли, вайн комаьршо гучуяьккхи. Аллах1 Ша а ву комаьрша, комаьршаниг везаш а ву. Комаьршонан масал хилла дIахIоьтти вайна юха а Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цIарах йолу регионан юкъараллин фонд а, цунна коьртехь лаьтта Кадырова Аймани а. БIеннаш эзарнаш бусалбанашна Нохчийчохь а, Россин регионашкахь а, дозанал арахьа а дIакхечи цо даьхначу сагIанийн дакъош. Дала къобал дойла цуьнан сагIанаш…».
Вайн ийман зуьйш беанчу хIокху Рамадан баттахь Нохчийчуьра бусалбанаш совбевлира Далла Iамал-Iибадат дарехь, Пайхамарна (Делера салам-маршалла хуьлда цунна) салаваташ дахкарехь, Дела хьехорехь, Къуръан дешарехь. ХIинца, хIара бутт чекхбаьлча а, вай малдала мегар дац Iамал-Iибадат дарехь, Делан беркат вайн халкъах а, махках а хьерчар алсамдалийта. Оцу ойланехь буй хаьа вайна вайн дукхах болу махкахой. Дала къобал дойла церан Iибадат.
Ткъа тахана вай даккхийде кху дийнах. Вай ирсе ду. Цхьа а ца го гIайгIане. АлхьамдулиллахI! Цундела, вай Далла хастам бан беза вайна хIара маршо, рицкъанан шорто, токхо яларна. Дала кхул тIаьхьа а латтайойла хIара паргIато.
С.ХАМЗАТОВ
№ 80, шот, 18 июль, 2015 шо