Мангалан бутт юккъе боьдуш хазахетар хилира вайн махкахошна «Орга» журналан рогIера номер араяларца. Заманан хьелашка хьаьжжина, хIинца ши номер вовшахтоьхна арадолуш ду «Орга». 5-гIий – 6-гIий номерш ю мангалан баттахь араевлларш. ХIутосург баттахь дерриге а дуьнено билгалдоккхуш дара Советийн союзо фашизмана тIехь толам баьккхина 70 шо кхачар. Вайн сийлахьчу Даймахкана къаьсттина лераме ду и терахь. Вайн йоккхачу пачхьалкхана онда иэшам хилла и буьрса тIом бахьанехь. 27 миллион стага шен дахар дIаделла тIеман хьаьттахь, толаман де герга дало болчу лаамца. КIезиг бац царна юкъахь вайн махкахой. 1941-чу шеран асаран беттан 22-чу дийнахь и луьра тIом болалуш итт эзар сов вайнехан жима стаг вара ЦIечу эскарехь гIуллакх деш. Ямартлонца немцойн фашисташ СССР-на тIелеттачу хьалхарчу деношкахь, шайн лаамехь кхин кхойтта эзар жима стаг тIам тIе дIавахара Нохч-ГIалгIайн Республикера. И деригге а тидаме эцна, чулацаме яздинчу вайн мехкан Куьйгалхочун декъалдарца а, патриотчески байташца а дIайолало журналан хьалхара агIонаш. Вайн махкахошна хууш ма-хиллара хIора шарахь хIутосург беттан итталгIачу дийнахь Нохчийчохь билгалдоккху иэсан а, лазаман а де. Россин турпалхочун, мехкан куьйгалхочун Кадыров Рамзанан цуьнца боьзна кхайкхам бу рогIерчу номерехь. Оцу денна лерина, вевзачу поэта Ахматукаев Адама язйина «Синойн пхьоьха» цIе йолчу поэмин кийсак еша аьтто бу дешархойн. Хазахета Оьрсийн сийлахь воккха поэт Александр Сергеевич Пушкин вина де редакцис тидамаза ца дитина. Россехь-м оьрсийн меттан де санна билгалдоккхуш ду иза хIора шарахь. Нохчийн гоьбевллачу поэташа Пушкинан кхоллараллера дина гочдарийн кочар довзуьйту дешархошна «Орга» журнало шен агIонаш тIехь. Чекхдаьллачу ХХ-чу бIешеран 90-чу шерашкахь зорбане яьллачу, Сулаев Мохьмадан «Лаьмнаша ца дицдо» цIе йолчу романа тIера кийсак ю хетарехь, яздархочун кху шарахь 95 шо кхочуш хилар тидаме эцна зорбане яьккхина. Ишта-м нохчийн проза езачарна алсам мерза кхаьънаш карор ду «Орга» журналехь. Бексултанов Мусан, Ахмадов Мусан, Минкаилов Эльбрусан дийцарш ду царна юкъахь. Журналистан Арсанукаев Мусан цхьана актехь йолу пьеса ю «Лариса мила ю?» цIе йолуш. Доьшучунна сих хьакхалур долуш ду Эльдиева Маретан «СовгIат» цIе йолу дийцар. Кху заманан дегаIийжамаш бевзаш, уьш лозуш яздина хетало авторан чулацаме могIанаш. Журналан чулацамо тоьшалла до редакцис, кIорггера ойла еш, къахьегна хиларна, дешархой резабархьама. Цундела массо рубрика маьIнечу материалех юьззина ю. Коьрта редактор Минкаилов Эльбрус само йолуш а, дешархошна пайдехь дерг довзийта болчу лаамца хьанал къахьоьгуш а хиларан тоьшалла ду иза. Цул совнаха, 2015-чу шеран хIутосург беттан кхойтталгIачу дийнахь 60 шо кхаьчна Iилманча, журналист, яздархо, литературовед волчу Минкаилов Эльбрусан. Цунах лаьцна Алиева Заринин статья ю журналан агIонаш тIехь. Еша дог доуьйтуш, говзачу маттаца, юбиляре болчу лерамца язйина ю иза. Бакъдерг дийцача, ерриге а номер а ю ишта маьIне, чулацаме.
ГАЗИЕВА Аза
№ 81, еара, 23 июль, 2015 шо