КхойтталгIа весет
Дена-нанна дика хилар
Абу ХIурайрата (Дела реза хуьлда цунна) дийцина:
– Делан Элча (Делера салам-маршалла хуьлда цунна) волчу цхьа стаг веара. Цо хаьттира: «ХIай Делан Элча, адамашлахь ас уггаре а чIогIа гIо-накъосталла дан дезарг мила ву?» Элчано (Делера салам-маршалла хуьлда цунна) жоп делира: «Хьан нана ю», – аьлла. Оцу стага юха а хаьттира: «ТIаккха мила ву?» – аьлла. Элчано (Делера салам-маршалла хуьлда цунна) элира: «Хьан нана ю». Оцу стага хаьттира: «ТIаккха мила ву?». Элчано (Делера салам маршалла хуьлда цунна) жоп делира: «Хьан нана ю», – аьлла. Стага хаьттира: «ТIаккха мила ву?». Элчано (Делера салам- маршалла хуьлда цунна)элира: «Хьан да ву», – аьлла.
(Ахьмад, Тирмизи).
Кхечу хьадисехь ду: «ХIай Делан Элча, ас уггаре а чIогIа накъосталла дан дезарг мила ву?», – аьлла хаьттича, Делан Элчано (Делера салам-маршалла хуьлда цунна) жоп делира: «Хьан нана ю, юха а – хьан нана ю, юха а, – нана ю, тIаккха хьан да ву, тIаккха цул дехьа верг ву», – аьлла.
Кхоччуш пайда хилийтархьама, вай даладо хIара тIаьхьадогIу хьадис.
Абу ХIурайрата (Дела реза хуьлда цунна) дийцина:
– Делан Элчано (Делера салам-маршалла хуьлда цунна) элира: «Сийсаз хили-кх, тIаккха а сийсаз хили-кх, тIаккха а сийсаз хили-кх – шен да-нана (цаьршиннах цхьаъ я и ший а) дуьненахь къандаллалц даьхна а долуш, цул тIаьхьа ша ялсамани чу цавахнарг».
ДейтталгIа весет
Гуттар ламаз деш хилар а,
Дена-нанна дика хилар а
Умаймата (Дела реза хуьлда цунна), Пайхамаран (Делера салам-маршалла хуьлда цунна) гIуллакххочо дийцира:
– Со яра Делан Элчанна (Делера салам-маршалла хуьлда цунна) ламаз эца хи дуттуш, тIаккха цхьа стаг чувеара. Оцу стага элира: «Соьга весет дехьа». Элчано (Делера салам-маршалла хуьлда цунна): «Цхьана а хIуманах Далла декъахо ма ве, хьайн дена-нанна муьтIахь хила, цаьршимма хьоьга хьайн доьзал (зуда), хьайн дуьне Iаддита бахахь, дIатасалахь уьш. Ахь къаьркъа а ма малалахь, баккъал а иза массо а вуон хIуманан доккха догIа ду хьуна. Иэсехь а волуш, ламаз ма диталахь, и дитинарг Делан а, Цуьнан Элчанан а шариIатера дIавели хьуна», – элира. (ТІабрани).
ПхийтталгIа весет
Ламаз динчул тIаьхьа олург
Маликан кIанта Анаса (Дела реза хуьлда цунна) дийцина, Умму Сулайм Iуьйрре Делан Элча (Делера салам-маршалла хуьлда цунна) волчу яхара, аьлла. Умма Сулаймас элира: «Сайн ламазна тIаьхьа ас ала дезаш долу дешнаш Iамадехьа суна». Элчано (Делера салам-маршалла хуьлда цунна) элира: «АллахIу Акбар» уьттазза ала, «СубхьанналлахI» уьттазза ала, «Альхьамду лиллахI» уьттазза ала, Цуьнга цул тIаьхьа хьайна луъург деха, Цо, «хIаъ», «хIаъ», олу хьуна». (Ахьмад, Тирмизи).
ЯлхийтталгIа весет
ХIора фарз-ламазна тIаьхьа олуш дерг
МуIаза (Дела реза хуьлда цунна) дийцина, Делан Элчано (Делера салам-маршалла хуьлда цунна), шен куьг схьа а лаьцна, элира, аьлла: «ХIай МуIаз, ВаллахI, суна хьо дукха ма веза. ХIай МуIаз, ас хьоьга весет ма до: хIора фарз ламазна тIаьхьа ахь, ца дитарца, «АллахIумма аIинни Iала зикрика ва шукрика ва хьусни Iибадатика» («ХIай Дела, суна гIо дехьа. Хьо хьехо а, Хьуна хастам бан а, Хьуна хаза Iибадат дан а»). алар». (Абу Дауд, Насал).
ВерхIийтталгIа весет
Зуькаран дозаллин хьокъехь
Бусран кIанта IабдуллахIа (Дела реза хуьлда цунна) дийцина:
– Цхьана стага элира: «хIай Делан Элча, исламан белхаш базбелла-кх суна, со даима а шех тасалур волу цхьа хIума дийцахьа суна». Делан Элчано (Делера салам-маршалла хуьлда цунна) элира: «Дела хьехош хьайн мотт тIуьна латтабе» (аьлча а, Дела дукха хьехаве). (Тирмизи, ибну Хьиббан).
Гулдинарг – Хьамзат Мухьаммад Солихь Іужаж.
Гочдинарг – Хатаев Руслан.
Зорбане кечдинарг – С.ХАСАНОВ