Бусалба дог а, ийман а долуш адам хила деза ша дечу диканех мах ца боьхуш , шен цIе яккхар дезаш воцург. Делера шена ял езар а, ткъа иштта ша санна волчу шен бусалба вешех а, йишех а дог лазар а ду иза. Цу Iалашонца йиллина хир ю Соьлжа-ГIалин В. Путинан цIарах йолчу проспектера маьхза кхача луш йолу Икрам кафе. Дуьххьара 2013-чу шарахь, мархийн баттахь, генарчу ярташкара схьалелаш долчу а, цIа кхача тIаьхьа дуьсуш долчу а адамашка суьйранна марха даста а, Iуьйкъа хенахь марха лаца а кхача латтор Iалашо йолуш схьайиллира иза. Дукха нахана доккха совгIат хилира цунах. Хан мел ели а йовза йолаелира иза. Исламан университетан студенташ а, сурсадан белхалой а, водительш а хуьлура кафен хьеший.
Кхача кечбан леррина Ташкентера кхайкхина балийна поварш бу. Шайн болх дика бевза царна, массо а тайпа даарш кечдан хаьа. Цул сов кафе чудогIучу адамашца чIогIа ийна бу, нохчийн гIиллакхаш а, Iадаташ а дика девза. Нохчаша санна хьаша дика тIелоцуш цхьа а къам дац олу цара, хаза гIиллакх шаьш а лардан хьовсу.
Оццул доккха саг1а доккхуш йолчу кафен дас (шен цIе яккха пурба ца ло) Мархийн бутт чекхбаьлча а дийнахь шина рожехь кхача латтор тIедиллина.
ХIора рожехь хаза, чомехь керла-керла даарш хуьлу цигахь. Делкъе 12 сахьт 30 минот яьлча йолалой 14:00 сахьт даллалц хуьлу, ткъа пхьор дуу хан 18 сахьт 30 минот яьлча дIайолалой 20:00 сахьт даьлча чекхйолу. Хиш а, стоьмаш а, хастоьмаш а ду массо а стоьла тIе охьадохкуш. Хьеший, даима а реза хуьлий, баркалла олий, д1абоьлху. ТIаьхьарчу хенахь кафе оьхуш берш алсам бевлла. Тайп-тайпана хенаш а, говзаллаш а йолу нах хуьлу цу чохь, вайн махкахой хилла ца Iаш, кхечу регионашкара хьеший а богIу кафе чу хIума кхалла. Ца вевза бусалба ваша, Дала къобалдойла хьан саг1а!
ДАНСАЛИКОВА Аза
Авторан сурт
№84, еара, 30 июль, 2015 шо