Нохчийн Республикин Куьйгалхочо, Россин Турпалхочо Кадыров Рамзана къаьсттинчу тергонехь латтош ду тIекхуьу чкъор кхетош-кхиорехь деш долу гIуллакхаш. Къона т1аьхье ийманехь кхиоран Цхьааллин Концепци ю республикехь кхиамца кхочушъеш.
И г1уллакхаш дийцаре дарна лерина кхеташо дIаяьхьира Нохчийн Республикин къоман политикин, арахьарчу зIенийн, зорбанан, хаамийн министра Умаров Джамбулата Нохчийн Республикин Куьйгалхочун а, Администрацин а динан, юкъараллин организацешца зIенаш латторан департаментан директорца Дадаев Ризванца а, Россин Федерацин субъекташкахь болчу Нохчийн Республикин Куьйгалхочун векалшца а цхьаьна.
«Хууш ма-хиллара, тIаьхьарчу хенахь, интернет чохь вайх лаьцна цхьацца харцдерг дуьйцуш статьяш хуьлу. И гIуллакх тесна дита мегар дац. Вай шуьйрачу хаамийн гIирсашкахула массарна а дIахаийта деза Нохчийн Республикин Куьйгалло бахархошна дечу пайдехьчу гIуллакхех лаьцна. Иштта регионан Куьйгалхочо Нохчийчоь кхиорехь а, маьрша хилийтарехь а, Россин Федерацехь вайн республика уггаре а тоьллачех субъект хилийтарехь а беш болу болх алссам гайта беза», – элира Умаров Джамбулата.
Цул тIаьхьа министра билгалдаьккхира Россин тайп-тайпанчу субъекташкахь Iаш болу нохчийн кегийрхой кхетош-кхиорехь беш болу болх кхин а алсамбаккха безаш хилар.
Министран д1адолорца Нохчийн Республикин Куьйгалхочун Россин регионашкарчу векалаллийн белхан эвсаралла лакхаяккхаран Iалашонца вовшахтоьхна Нохчийн Республикин Куьйгалхочун Россин регионашкарчу векалийн Совет. Цуьнан куьйгалхо хIоттийна Догаев Ахьмад.
А.АБДУЛАЕВ
№84, еара, 30 июль, 2015 шо