Дукха хан йоццуш Шелковски районерчу Оьрза-ГIалахь Культурин цIийнан белхахоша вовшахтоьхнера «Экстремистийн организацех кхетам» цIе йолу цхьаьнакхетар. Берашна хьехам бира Культурин цIийнан директора К. Ю Митрошкинас.
– Экстремистийн гIуллакх – иза бусалба нахана ницкъ бар, къинхетамза церан дахар дохор, Россин Федерацин цхьаалла талхор ду. Цунна дуьхьало ян вайна массарна а юкъахь барт хила беза, церан хабарех Iеха ца дала аш шайна ца хуург Iеламнахе хатта деза. Муьлххачу а хаттарна нийса жоп лур долуш Iеламнах бу вайн, – бохура цо.
Шен къамелехь К. Митрошкинас иштта билгалдаьккхира кху тIаьхьарчу ткъех шарахь оцу зуламхойн тобанашна жим-жима кхеташ алссам вовшахкхета аьтто баьлла хилар а, цара бусалба нах байина ца Iаш, тIекхуьу къона чкъор Iехош а, махкана даккхий зуламаш деш хилар а.
– Бусалба дин ойъуш ду шаьш бохуш адамашна тIехь къизаллаш а латтош лелаш бу уьш. Царах цхьаболчарна Къуръан деша, Iаьрбийн мотт хиъча уьш баккъал а Делан дин тIехь къахьоьгуш бу моьттуш Iехало цхьаболу кегийрхой. Иштта дебаш бу уьш. Хьекъална аьрта верг кийча хуьлу дIааьлларг бакъ деш тIелаца. Маггане а мегар дац мила ву а ца хуучу стага дийцинчух теша. Шех нахана зулам далале ойла ян еза, кхо дуьйцург бух болуш, нийса ду-те я дац-те аьлла. Цул совнаха, хатта а деза Iеламнахе. Вайга цу хьокъехь дуккха а дийца а дуьйцу вайн махкарчу Iеламнаха – бохуш, дуккха а хьехарш дира директора.
Шайна иштта, хьехарш деш, диканиг довзийтарна директорна баркалла а олуш, цу тайпа цхьаьнакхетарш шайца кест-кеста дар дийхира цигахь хиллачу бераша а, кхиазхоша а.
МАТАГОВ Исхан