Хонкаран малхбалехь эскаран ковр йогIучу некъаца эккхийтар а дина, эскархошна герзаш диттира Курдистанан белхан партин декъашхоша. Цигахь ши эскархо велла, шинна чевнаш хилла.
***
Японехь тIех йовха хиларна тIаьхьарчу цхьана кIирнах 25 стаг кхелхина, масех эзар стаг больницашка охьавиллина. Дукхах болчеран таIам лакхабаьлла.
***
ТIех чIогIа догIанаш дахкар бахьанехь хиш а дистина, токхамаш а хилла Чинехь а, Индехь а. Iаламан оцу бохамехь Индехь лаххара а бIе стаг кхелхина.
***
Эбола цамгарх Либерехь 70 эзар бер кхелхина. Иштта хаамаш бина ООН-н кхерамазаллин Советехь.
***
Африкин пачхьалкхашкара Европе богIучу некъаца хIокху шарахь лаххара а ши эзар мигрант велла. Европе схьакхача аьтто баьлла 200 эзар сов стеган. Тайп-тайпанчу мехкашкахула дIасабахана уьш.
***
Йеменан пачхьалкхан эскаршний, гIаттамхошний юкъахь юха а къиза тIемаш дIабуьйлабелла. ТIамехь хIаллакьхуьлуш болчарал совнаха денна маьрша нах бу цигахь бойъуш.
***
Великобританин оборонан министра дIахьедина Иракехь «иблисан пачхьалкхана» дуьхьал дIахьочу къийсамехь шайн салташа дакъалоцург цахилар.
***
Иранан Iедало Шеман куьйгалле дехна къоман цхьааллин правительство вовшахтохарца махкахь маслаIатан некъ лахар.
***
Чехехь ши цIерпошт вовшахкхетта. Оцу бохамехь иттаннаш пассажираш лазийна. Некъан хьовзам хиларна бехкениг къастош таллам бу дIахьош.
***
Россина дуьхьал санкцеш яр бахьана долуш Италин фермершна а, юьртан бахаман декъехь къахьоьгуш болчу кхечу белхахошна а 1,2 миллиард еврона зен хилла.
***
Украинна 1,7 миллиард доллар кредит делла дуьненаюкъарчу валютин фондо. Иза дIатакхарна цхьаъ дийриг хир ду-кх П.Порошенкос а, цуьнан гуоно а.
***
Нижни Новгородерчу цхьана хIусамехь делла ялх бер карийна. Россин талламан комитето дIадолийна талламан гIуллакхаш.
№87, еара, 6 август, 2015 шо