Яндарбиев Хьамзат, яздархо, хьехаран Iилманийн кандидат, вина 1940-чу шеран август беттан 5-чу дийнахь Йоккхачу АттагIахь. Дешна Нохч-ГIалгIайн пачхьалкхан университетан филологин факультетехь. Белхаш бина юьртарчу школехь, Нохчийн пачхьалкхан хьехархойн институтехь, Хьехархойн говзалла лакхаяккхаран институтехь. Карарчу хенахь Нохчийн пачхьалкхан университетан Нохчийн а, юкъарчу а филологин институтан оьрсийн а, кхечу къаьмнийн а литературин кафедрин куьйгалхо ву. Дийцарш зорбане дийлина юкъарчу гуларшкахь а, муьран зорбанехь а. «БIешеран зулам» дийцарийн а, «ХIара исбаьхьа а, харц а дуьне» стихийн а гуларийн автор.
Исмаилов Абу, поэт, вина 1949-чу шеран август беттан 11-чу дийнахь Казахстанехь. Дешна Нохч-ГIалгIайн пачхьалкхан университетан филологин факультетехь. Белхаш бина Нохч-ГIалгIайн книгийн издательствехь, «Даймохк» газетехь, «Орга» журналехь, кхечу изданешкахь. Стихаш дуьххьара зорбане евлла 1965-чу шарахь «Ленинан некъ» газетехь. ХIетахь дуьйна цуьнан исбаьхьаллин белхаш зорбане бийлина муьран зорбанехь а, юкъарчу гуларшкахь а («Iуьйренан аьзнаш», «Даймехкан мукъамаш», «Сатасаран сахьт», «БIаьстенан хиш») «Дош» монографин, «Бирдолаг», «Йозанаш» (шина томехь) стихийн, поэмийн гуларийн автор.
Арсанукаев Шайхи, Нохчийн Республикин халкъан поэт, «Нохчийн Республикин сийлахь гражданин» вина 1930-чу шеран август беттан 15-чу дийнахь Веданан кIоштан Дишни-Веданахь. Дешна Семипалатинск гIаларчу финансийн техникумехь, Нохч-ГIалгIайн пачхьалкхан хьехархойн институтан филологин факультетехь. Белхаш бина Веданан кIоштан финотделан заведующи, «Колхозан дахар» газетан редакторан заместитель, Нохч-ГIалгIайн книгийн издательствехь редактор, «Орга» альманахан коьрта редактор, Нохч-ГIалгIайн АССР-н яздархойн Союзан правленин председатель, Нохчийн пачхьалкхан университетан нохчийн литературин, фольклоран кафедрин доцент волуш.
«Лаьмнашкахь Iуьйре» цIе йолу стихийн хьалхара гулар араяьлла I965-чу шарахь. ХIетахь дуьйна цо арахецна стихийн, поэмийн ткъех гергга гулар. 2009-чу шарахь зорбане яьлла поэтан хаьржинчу говзарийн ши том («Сийна гене», «Уьш хийца тарлуш дац»).
Кхалхар хилла 2012-чу шарахь.
№88, шот, 8 август, 2015 шо