ХIора шарахь билгалдоккхуш ду Светофоран дуьненаюкъара де. И тайпа де муххале а тидамза дуьтур дацара Нохчийн Республикин С.Михалковн цIарахчу республикин берийн библиотекин куьйгалло. Оцу денна кечбина книгийн гайтам а, «Светофор – тхан накъост» аьлла кхеторан – хаамийн цхьаьнакхетар а хилира библиотекехь. Библиографин отделан белхахочо Абдурзакова Заирас вовшах а туьйхира, дIа а даьхьира Светофоран денна лерина цхьаьнакхетар.
Библиотекин кегийчу книгашъешархошна хиира дуьххьарлера светофор юкъаяьккхинарг ингалсхо Найт Джейн хилар. Цо йина светофор Лондонехь Парламентана уллехь дIахIоттийра 1868-чу шарахь. Амма кхо шо даьлча, цо йина светофор, уллехь лаьтта полицейски лаза а веш, иккхина хилла. Эццахь светофорах дог даларх иза йицйина 50 шо а даьлла. Юха, 1910-чу шарахь автоматикин светофор юкъаяьккхина шена чохь шина басахь чиркхаш а долуш. Ткъа Россехь светофор 1930-чу шарахь юкъаяьлла. Иштта светофорах дерг вуоно хаза а, чулацаме а дийцира библиотекин белхахоша. Бераша лерина ладоьгIура светофоран билгалонех лаьцна а, некъан бакъенийн хьокъехь а дечу къамеле. Водителийн а, гIашлойн а бакъонех, декхарех дерг а дийцира царна. Библиотекин ешархо а, жигархо а йолчу Амагова Софияс дийцира светофорах лаьцна шена хуург.
Вайн мел жимачу юьртахь а машенаш бIенашкахь йолчу заманахь светофор яцахьара йиш а яцара. Цхьана минотана ток дIаяьлча а хьовзам хуьлу некъаш тIехь. Светофор хилар а тоьаш дац, массара а некъан бакъонаш Iамо а еза, ларъян а еза.
Цу тайпанчу цхьаьнакхетарех доккха беркат, пайда болу берашна.
З.ХИЗИРОВА
Авторан сурт
№91, шот, 15 август, 2015 шо