Адамийн могашаллина гIаролехь латтар! Цул мехала хIун хир ду доккхачу дуьненахь! Эдиева Хьаван бераллехь дуьйна бара и лаам, адамийн могашаллина гIаролехь латта, деэшначунна гIо-накъосталла дан, лазаро йийсаре лаьцначунна къинхетаме орца кхио. Цундела 1976-чу шарахь Шелан районерчу Гермчигара юккъера школа кхиамца чекхйоккхий, дукха ойланашка йийлар доцуш, Соьлжа-ГIаларчу медицинин училище деша йоьду йоI. Фельдшер хила лууш яра иза. Вайна массарна хууш ма-хиллара юьртахь Iаламат оьшуш говзалла яра Хьавас хаьржинарг. Нохч-ГIалгIайн Республикин коьртачу шахьарна генахь йолчу ярташкахь хIинца санна лаккхара дешар дешначу лоьрийн кхачо яцара цу муьрехь. Фельдшер тIекхоччехь хилча боккха Делан къинхетам тIебоьссина хеташ зама яра иза. Училищехь доьшуш йолуш Шелан районан больнице практике хьажийра вайн турпалхо. ЙоьIан эсала хилар, цуьнца цхьаьна цуьнан каде хьийзар, хаарш кIорггера хилар тидаме эцна, дешна ялале цу больнице операционни медйиша балха кхайкхира кхуьнга. Иштта дIаболабелира Эдиева Хьаван хьаналчу къинхьегаман некъ. Ког лаьттах ца кхеташ бора цо болх. Дархошца кIеда-мерза яра, белхан меттиг цIена латтайора, накъосташца тарлуш, мегаш чекхъяла хууш яра. Иттех шарахь болх бира цо Шеларчу больницехь. Iаламат дукха Сийлаллин грамоташ, баркаллин кехаташ ду белхан декхарш тIех дика кхочушдарна Хьавана Iедало, больницин куьйгалло делла. Шеларчу больницехь болх беш йолуш яхара Хьава маре а. Бакъду доьзал стамбала болабелча белхан меттиг хийца дийзира цуьнан. Кхуьнан хIусамда Исламгиреев Бадрудди Аргунера вара, тIаккха Хьаван а кхидIа долу Iер-яхар цигахь дIакхехьа дийзира. Заманан йохалла хаза доьзал вовшахкхийтира цуьнан; кхо кIант, цхьа йоI. Ша санна гIиллакхехь, оьзда, собаре хьалакхиийна цо доьзал. 1985-чу шарахь дуьйна Аргунерчу №1 йолчу больницехь медйишин болх беш яра иза. 2002-чу шарахь Iедало Аргунехь тIамах бевдда баьхкинчеран туш йиллича, гIалин куьйгалло цигахь болх бар тIедиллира кхунна, белхан зенделларг, говзалла лаккхарчу тIегIанехь хилар тидаме эцна. Дукха адам дара цигахь. Амал хала ерг нислора. Амма массаьрца собаре йолуш, хьаьнцца а бийца мотт карош, кIоршаме йист хилла цхьаьннан дог ца дохош мерза чекхъелира иза. Массо маьIIера къизачу тIеман ирча лараш дIайохуш, эххар 2008-чу шарахь рагI Аргуне кхечира. ПВР-ехь долчу адамашна хIусамаш нисйина, и туш дIаяьккхича, цкъачунна ша хьалха болх беш хиллачу больнице схьаеара Хьава. Амма дукха хан ялале цуьнга дIакхайкхира Аргунерчу сихагIодаран больнице. Тахана фельдшеран даржехь кхиамца цигахь болх беш ю Эдиева Хьава. Цкъа мацах жимчохь безаш хаьржина болх бу цуьнан иза. Де-буьйса ца лоьруш шен юьртахойн могашаллина гIаролехь лаьтташ ю и хьуьнаре зуда. Дархошна тайна цуьнан дарбане куьйгаш.
ГАЗИЕВА Аза
№92, шинара, 18 август, 2015 шо