Лерринчу тидамехь латтадо вайн республикин куьйгалло къоначаьрца кхетош-кхиоран болх бар. Таханлерчу дийнахь Нохчийн Республикехь кегийрхошца болх беш дуккха а организацеш ю. ХIора дийнахь бохург санна тайп-тайпана цхьаьнакхетарш дIахьо хьуьжаршкахь, школашкахь, вузашкахь, техникумашкахь. Кегийрхошна пайдехь дерг дуьйцуш тайп-тайпана хьехамаш бо динан, юкъараллин организацийн жигархоша.
Оцу организацешна юкъахь къаьсташ ю «Иман» тоба. Иза зудаберашца болх барна лерина ю. Студенташ болуш буьйлабелла клубан декъашхой болх бан. Мужедова Иман ю тобанна хьалхаяьлла. Шайн бусалба йижаршна пайде хила болчу лаамца арабевлла къона студенташ массанхьа а дика тIеэцарна а, зудаберийн юкъараллина оьшуш хиларна а денна шорлуш ду клубехь болчеран могIарш.
2011-чу шарахь 5-чу январехь йолаелла «Иман» тоба болх бан. Таханлерчу дийнахь тобанахь жигара дакъалоцуш 35 йоI ю. Республикехь мел йолчу районашка кхочу уьш, массанхьа а зудабераша хазахетарца тIе а лоцу.
«Тхан Iалашо иза вайнехан зудабераш бусалба динах кхеташ, шайн культура евзаш, духарца, леларца, къамелаца муха хила деза хууш, оьзда а, гIиллакхе а уьш кхиар ю. Зудаберашка бусалба динан хазалла, нохчийн къоман оьздангалла йийца сайн аьтто хиларна Далла хастам бо ас, и болх даггара бан а хьожу. Делан къинхетамца вайн махкара зудабераш чIогIа оьзда ду, уьш иштта хиларх со йоккхае», – дийцира Нохчийн регионан юкъараллин «Иман» организацин куьйгалхочо Мужедова Имана.
Клубан декъашхоша тайп-тайпанчу теманашна лерина лекцеш йоьшу школашкахь, вузашкахь, больницашкахь, кхийолчу учрежденешкахь. Цхьаьнакхетаршкахь дакъа мел лоцучу зударийн а, зудаберийн а леррина терго йо кхара, царна хаа мел луург дийцаре до, хаттаршна жоьпаш ло.
Клубо вовшахтоьхна тайп-тайпана проекташ ю: «Къуръанан къона ешархо», «Со нохчи ю», «Сан хьомечу нанна», «Нохчийн къоман истори, культура, Iадаташ», Iаьрбийн, ингалсан меттанаш Iаморан курсаш и.дI.кх.
Тайп-тайпана акцеш дIахьо клубан декъашхоша. «Тасбихь», «Хьайгахь хиджаб муха хета хьажа», «Ламазах лаьцна – дерриге а», «Хиджаб – ма-ярра йолчу хазаллин, цIеналлин, зуда Iалашъяран билгало». Цу тайпа йолчу акцешкахь хьехамашка ладогIа а, хиджаб, фарз духар тIедоха а аьтто хуьлу зудаберийн. Ишттачохь гуттаренна а хиджаб туьллуш долу зудабераш нисло, цунах баккхийбе «Иман» тобан декъашхой. Йовлакх нийса муха лело деза, нахана юкъахь йоI муха лела еза дуьйцу цара цу тайпанчу цхьаьнакхетаршкахь.
Зудаберашна а дика накъостий хилла дIахIиттина клубан декъашхой. Дала бохучунна тIехь схьабогIуш бу уьш. Шайн бусалба йижарех дог лазарна, уьш массо а хIуманна тIехь нисбелла хила, шариIат, Iадаташ лардеш хила лаарна бу «Иман» тобанан декъашхой доггаха къахьоьгуш. Дала аьтто бойла церан!
АВХАДОВА Хьава
№92, шинара, 18 август, 2015 шо