Соьлжа-ГIаларчу Радион цIийнехь хIокху деношкахь шуьйрачу хаамийн гIирсийн куьйгалхойн Советан председатель а, цуьнан заместитель а хоржуш, кхеташо дIаяьхьира Нохчийн Республикин къоман политикин, арахьарчу зIенийн, зорбанан, хаамийн министра Умаров Джамбулата.
Д.Умаровс довзийтира дийцаре дан лерина долу гIуллакхаш. Шуьйрачу хаамийн гIирсийн куьйгалхойн Советан председатель а, цуьнан заместитель а харжарх дийцина ца Iаш, карарчу хенахь журналисташна хьалха лаьттачу декхарех лаьцна а дийцира цо.
– Пачхьалкхан хаамийн политикин эвсаралла лакхаяккха еза вай. Мехала болу хаамаш бахархошка дIа а кхачош, регионан шуьйрачу хаамийн гIирсаша бан ма-беззара болх бан беза, Россин цхьаалла талхо гIерташ, зуламхоша баржочу харц хаамашна дуьхьало ярхьама.
Со тешна ву, хаьржинчу Совето цу хьокъехь бIаьрла кхиамаш хуьлуьйтург хиларх, – бохура министра.
Иштта цо билгалдаьккхира къахьегаре терра бен дикачу агIор хийцамаш хирг цахилар а, болх, баккха ма-лло жигарбаккха безар а.
Кхеташонехь Советан председатель «Вести республики» газетан коьрта редактор Исмаилов Илес хаьржира, ткъа цуьнан заместитель – «Даймохк» газетан коьрта редактор Шамсудинов Бувайсар.
И. АТАГОВ
№97, шот, 29 август, 2015 шо