Кхаж тасаран юкъарчу денна кечамаш барна тIехь таллам латторан Iалашонца кху деношкахь Нохчийчу веара Россин Федерацин Коьртачу (центральни) харжамийн комиссин декъашхо Шапиев Сиябшах.
Цу декъехь Соьлжа-ГIаларчу «Грозный-Сити» махлелоран, самукъадаккхаран комплексехь кхеташо дIаяьхьира цо а, Нохчийчоьнан харжамийн комиссин председатела Байханов Iумара а. Цигахь дакъалецира республикин Куьйгалхочун, Правительствон администрацин а, Нохчийчоьнан МВД-н а, Гуьмсан районан администрацин а, республикин МВД-н а, прокуратурин а векалша.
Цхьаьнакхетар дIадолош, I.Байхановс билгалдаьккхира кхаж тасаран юкъарчу дийнахь Гуьмсан районан а, оцу районерчу Бена-Юьртан а депутатийн кхеташонашка депутаташ хоржург хилар.
– Гуьмсан районехь дIахьур болчу харжамашкакахь 4 политически партин декъашхоша дакъалоцур ду, верриге а хьалха теттинарг 112 кандидат ву. Оцу денна тхо лерина кечамаш беш ду, – элира цо.
2015-чу шеран 13-чу сентябрехь Гуьмсан районехь а, оцу районерчу Керла-Бена юьртахь а харжамаш дIабахьарна кечамаш баран декъехь беш болу белхаш бовзийтира Гуьмсан районан харжамийн комиссин председатела Берсанукаев Ахьмада. Цо дийцарехь, кечъеш ю кхаж тасаран пункташ, иштта меттигерчу бахархошца дIахьош цхьаьнакхетарш ду.
Кхеташонехь дакъалаьцначу республикин куьйгаллин векалша дIахаийтира шаьш харжамаш дIахьош а, царна кечамаш беш а гIо дан кийча хилар.
Хь.АВХАДОВА
№ 98, шинара, 1 сентябрь, 2015 шо