Кху деношкахь Нохчийн Республикехь хилира Россин Федерацин чоьхьарчу гIуллакхийн министран хьалхара заместитель, МВД-н чоьхьарчу эскарийн (ВВ) коьртакомандующи Золотов Виктор. Цо а, Нохчийн Республикин Куьйгалхочо Кадыров Рамзана а кхеташо дIаяьхьира Россин МВД-н ВВ-н оперативни Iалашонан ша къаьсттина йолчу 46-чу бригадин командни составца.
Кхеташо дIаяьлча и шиъ хилира Хоси-Юьртан уллехь йолчу полигонехь, бакъонаш Iалашъяран органийн белхахойн тIеман хьуьнарш муха ду а хьаьжира.
– Къаьсттина халчу хьелашкахь тIеман гIуллакхаш дар карадерзоран Iалашонца белхаш бира цара. ТIеман лаккхара хьуьнарш гайтира В.Золотовна МВД-н белхахоша. Леррина йолу операцеш дIаяхьарна лерина йолчу технике а, спецназан кечамбаран а, садаIаран а хьелашка а хьаьжира инарла – шен instagram агIон тIехь хаам бира Нохчийчоьнан Куьйгалхочо.
Иштта Кадыров Рамзана билгалдаьккхира буьйсанна В.Золотов Нохчийчоьнан МВД-н ОМОН-н тIеман кечамаш муьлхачу тIегIанехь бу хьаьжна хилар.
– Тхо Хоси-Юьртара Соьлжа-ГIала догIуш ОМОН-н базе ваха шен Iалашо хилар хаийтира цо. Цигахь пхеа минотехь кечбала ларийра белхахой. Инарлас лакхара мах хадийра ОМОН-н кечамна. Цо билгалдаьккхира нормативашца кечбала луш йолу хан цхьа сахьт ах сахьт а, ткъа сихачу хьелашкахь цхьа сахьт а хилар – бохура Кадыров Рамзана.
Иштта регионан Куьйгалхочо тIетуьйхира Россин чоьхьарчу гIуллакхийн органашкахь оццул лакхарчу тIегIанехь тIеман кечам хIинццалц хилла цахилар.
– Омоновцаша тIеман лаккхара хьуьнарш гайтира. В.Золотовна хиира ОМОН-н белхахой а, Нохчийчоьнан хIора вахархо а Даймохк ларбан а, Россин Президентан Путин Владимиран муьлхха а тIедиллар кхочушдан а кийча хилар, – элира цо.
Р.РАМЗАНОВ
№99, еара, 3 сентябрь, 2015 шо