ХIокху деношкахь Республикин бахархойн барт хиларан а, цхьааллин а денна лерина экскурси дIаяьхьира Зорбанан цIийнарчу Къоман журналистикин музейхь. Дагадоуьйту, билгалъяьккхина музей схьайиллина кху шеран август баттахь республикин «Даймохк» газетан редакцехь.
«Къоначу корреспондентийн» школин ладогIархошца экскурси дIаяьхьира Нохчийн Республикин Журналистийн союзан куьйгалхочо Хатуев Ислама, «Къоначу корреспондентийн» школин директора Юнусов Хьамзата, «Даймохк» газетан коьртачу редактора Шамсудинов Бувайсара.
Экскурси дIайолош, И.Хатуевс элира: «Шуна ма-хаъара, Нохчийн Республикин хьалхарчу Президента Кадыров Ахьмад-Хьаьжас 2002-чу шеран 4-чу сентябрехьлерчу шен Указца чIагIдина ду Республикин бахархойн барт хиларан а, цхьааллин а де. Республикин кхиар хилийтарна уггаре а чIогIа оьшург ду бахархойн барт хилар а, къаьмнийн цхьаалла а. Оцу декъехь хаамийн гIирсаша доккха маьIна лелош хилар билгалдаккха лаарца доьзна ду таханлера экскурси вовшахтохар».
Музейн экспонаташна юкъахь ю тайп-тайпанчу хенашкара видеокамераш, фотоаппараташ, диктофонаш, зорбатуху машенкаш, ХХ-чу бIешеран 50-чу шерашкахь дуьйна 2000-гIа шераш кхаччалц йолчу хенахь арадийлинчу газетийн, журналийн цхьацца экземпляраш.
Музейхь экскурси дуьххьара дIахьош хилар билгалдоккхуш вистхилира Хь.Юнусов: «Шуна, къоначу корреспонденташна, тIера тахана дуьххьара экскурси яр дIадолош ду. Шуна къоман хьалхалерчу журналистикин хилла дахар довзийта, 1990-чу а, кхин хьалхарчу а шерашкахь журналисташа хIун гIирсаш лелийна хаийта а, цу хенахь зорбане йийлина материалаш йовзийта а вовшахтоьхна ду хIара гIуллакх».
Хьовсархой лерина хьоьжура музейн экспонаташка, дуккха а хаттарш кхолладелира церан, оцу дерриге а хаттаршна жоьпаш луш вара «Даймохк» газетан коьрта редактор Шамсудинов Бувайсар. Цо музейн экспонаташ гайтина а ца Iаш, 1923-чу шарахь дуьйна йолу газетан истори йовзийтира, газетехь болх муха дIахьо а гайтира.
Шеко йоццуш, кегийрхойн журналистикин хьаьрмахь къахьега йолу дог-ойла чIагIйира экскурсехь хиларо.
Хь.Авхадова
№100, шот, 5 сентябрь, 2015 шо