Россин Федерацин МЧС-н Нохчийн Республикехула йолчу коьртачу урхаллин белхахоша Залаев Ризваний, Сайдаев Султаний кху деношкахь пресс-конференци дIаяьхьира вайн республикин журналисташца. Дийцаре дира республикехь цIерш йийлар а, и бохамаш ца хилийта лелон дезаш долу бахьанаш а.
Карарчу шеран 2-чу августера хIара хан кхаччалц йолчу юкъана 256 цIеяьлла меттиг хилла вайн республикехь. Оцу бахьанина 2 стаг велла, 34 лазийна, 8,256 соьман барамехь зен а хилла. ЦIерш йийларна бехке веш Iедало жоьпе озийна 191 стаг. Р. Залаевс а, С. Сайдаевс а дийцарехь, бахархой лар цабаларна ду и цIерш йийлар.
Нах цIерш йийларх ларбаларе кхойкхура цара. Цхьаъ хилла а бохам кIезиг хир бара массо ларлуш хилча.
– ХIораммо а шайн-шайн керташкара газ, электричество тидамза ца юьтуш, ларъеш хилахь, и бохамаш мелла а лахлур бу. Вайна ма-хаъара, республикин бахархошца кест-кеста цIе яларх лардала Iаморан профилактикин белхаш беш ду тхо, – элира Р. Залаевс.
Иштта цо билгалдаьккхира, шайна бахархошца профилактика яран белхашна тIехь гIо-накъосталла деш тайп-тайпана министерствош а, ведомствош а, юкъараллин организацеш а хилар.
И.МАТАГОВ
№101, шинара, 8 сентябрь, 2015 шо