Кху деношкахь Нохчийн Республикин къоман политикин, арахьарчу зIенийн, зорбанан, хаамийн министран Умаров Джабулатан т1едилларца цуьнан заместитела Гудаев Лоьмас а, республикин журналистийн союзан председатела Хатуев Ислама а «Столица плюс» газетан редакцин коллективана шайн керла коьрта редактор вовзийтира.
– 2002-чу шарахь дуьйна кху газетехь коьртачу редакторан болх бина йолу Абубакарова Марина дика белхахо а, накъост а хилла лаьттина массарна а. Газетана а, белхахошна а сагатдеш, цкъа а цхьанна а эшам ца беш, даггара болх бина цо. Шех ала диканиг бен ца дуьтуш чекх а яьлла, – элира шен къамелехь Л.Гудаевс. – Цуьнан шен лаамца Марина редакторан декхарех мукъайитина, цуьнца доьзна газетан коьрта редактор чIагIвина Закриев Iийса. ХIара вайна массарна а вевзаш ву. Журналистикехь кхуо болх бен дуккха а хан ю. Кхуьнан гIоьнца газет шен чулацамца керлачу тIегIане дериг хиларх тешна а ду вай.
I.Закриевс кхул хьалха белхаш бина «Нана» журналехь а, «Вести республики» газетехь а, кхийолчу меттигашкахь а, этнокультурин «Национальный колорит» журналан проектан автор а хилла.
Редакторан дарж шех тешорна баркалла а олуш, 1.Закриевс билгалдаьккхира:
– Редакцехь дика белхахой бу, шайна тIедехкинчу декхаршца дика ларор болуш. ТIейогIучу хенахь, тхайн ма-хуьллу, болх кхин а дика бан хьовсур ду тхо. Цхьацца керла рубрикаш, дика ешархойн конкурсаш а еш, газетан электронни кеп керлачу тIегIане а йоккхуш, болх бийр бу. Иштта социальни сеташ чохь болх жигара дIакхехьа дагахь а ду тхо.
Цул тIаьхьа, редакцин белхахоша довха дешнаш элира шайн хиллачу коьртачу редакторх М.Абубакаровах лаьцна. Иза муха куьйгалхо хилла а, цо муха Iуналла дина а дийцира. Керла редактор а иштта хир ву аьлла дегайовхо хилар а хаийтира.
Хь.АВХАДОВА
№102, еара, 10 сентябрь, 2015 шо