Нохчийн Республикин Куьйгалхочо Кадыров Рамзана шен instagram агIон тIехь Къуръанан сураташ тIехь долу книга экстремистски лараран хьокъехь болу Къилба-Сахалински суьдан сацам нийса цахилар дIа а хоуьйтуш, иза юха толлург хилар билгалдаьккхира. Цу декъехь догIуш долу тIедиллар дина адвокатана.
– Сан тIедилларца адвоката апелляци яран Iалашонца кечдина кехаташ ду. Суьдан сацам законаца богIуш цахилар ларар доьхуш, арз дийр ду гражданийн гIуллакхашкахула йолчу Къилба-Сахалински суьдан коллеге, –элира регионан Куьйгалхочо.
Дукха хан йоццуш прокуроран Билобровец Татьянин лехамца суьдхочо Перченко Натальяс «Деле дехар: исламехь цуьнан маьIна а, меттиг а» книга экстремистски лерина. Оцу книги тIехь далийна ду бусалбанаша хIора дийнахь олуш долу Къуръана тIера дешнаш – «Хьуна сужуд до оха, гIо дар хьоьга бен ца доьху» (Аль-Фатихьа сурат), «АллахIаца нисвеш, кхечаьрга цхьаьнгга а ма деха» (Аль-Джинн сурат).
Кадыров Рамзана билгалдаьккхира дуьненан берриге а бусалбанаша ламазаш Къилба-Сахалински суьдо экстремистски лерина долчу сураташца дIадолош хилар. Иштта цо дийцарехь, цо а, цуьнан тIеман накъосташа а, деза Къуръан а доьшуш, Россин цхьаалла ларйина, дуьненаюкъарчу терроризмаца а, экстремизмаца а тIемаш бина.
– Терроризмаца а, экстремизмаца а къийсам латтош, шен дахар дIаделла Нохчийн Республикин хьалхарчу Президента, Россин Турпалхочо Кадыров Ахьмад-Хьаьжас а, эзарнаш цуьнан накъосташа а. БIешераш хьалха эзарнаш нохчий, Къуръана тIехь чIагIо а еш, Россин империн мостагIашна дуьхьал тIемаш бан арабовлуш хилла, – бохура Кадыров Рамзана.
Республикин Куьйгалхочо дIахаийтира ша Къуръан Iалашдарехь шен дахар кхоориг цахилар.
– Аса жоп доьхур ду цаьргара, хIунда аьлча суна хIокху дахарехь Къуръанал деза цхьа а хIума дац. Оцу новкъа дIаваха кийча ву со. Суьдхо Н.Перченко а, прокурор Т.Билобровец а Россин мостагIий а бу, шайтIанаш а ду, –тIетуьйхира цо.
Р.РАМЗАНОВ
№103, шот, 12-г1а сентябрь, 2015 шо