ХIокху деношкахь Красноярскехь чекхъяьлла дзюдо кепара охьатохархлатарехула Россин чемпионат. Цигахь дакъалоцуш вара Россин 62 регионера 500 сов спортсмен, царна юкъахь – Нохчийчуьра 25 дзюдоист а.
Вайн спортсменех пхеаннан аьтто хилира толаман меттигаш яха. Ша аьлча, шайн-шайн йозаллин категорешкахь дато мидалш ехира Шамилов Якъуба (66 кг.), Сулейманов Iумар-Хьаьжас (81 кг.), кхоалгIа меттигаш ехира Яшуев Ислама (60 кг.), Денильханов Iарбис (66 кг.), Жамбеков Сайд-Эмис (90 кг.).
Россин чемпионатехь толаман меттиг яккхар боккха кхиам бу, цига кхачархьама билггал а хьуьнар оьшу, цундела оцу кхиамца декъалбан богIу лакхахь цIерш яьхна спортсменаш. Красноярскехь баьхначу толамаша царна некъ баьстина дуьненаюкъарчу турнирашка.
Хь.АБАЕВ
№104, шинара, 15 сентябрь, 2015 шо