Хенан йохалла тайп-тайпана белхаш беш, даима а шен хаарш лакхадохуш, къахьоьгучарех ву 2001-чу шарера таханалерчу дийне кхаччалц Хьалха-МартантIерчу Берийн кхоллараллийн цIийнехь прикладни искусствон хьехархочун болх беш волу Авхадов Султан.
Ша хьалха бинчу белхашкахь шена зеделлачух пайда а оьцуш, Iамадо цо бераш. 1971-чу шарахь Соьлжа-ГIалин мехкадаьттан институте деша ваханчул т1аьхьа, цигахь 4-чу курсехь доьшуш волуш, Соьлжа-ГIаларчу (Ремонтно-наладочное предприятие) заводехь болх бан волавелла иза. 1977-чу шарахь Нохч-ГIалгIайн Радио-технически заводе дехьаваьлла. Цигахь инженер-технологан даржехь болх бина.
1980-чу шарахь дуьйна «Чечингпромстройматериалы» КСМ-1 ЧИГУ+-П-н заводехь болх бина. Миччанхьа болх беш хилча а, шена т1едехкинчу декхаршца дика ларош схьавеана Султан. Балхаца ларорна делла тайп-тайпана совгIаташ а ду. Къаьсттина еза хета цунна Нохчийн Республикин хьалхарчу Президента Кадыров Ахьмад-Хьаьжас елла Сийлаллин грамота.
Иштта, кхиамца болх бо цо тахана. Дешархошца каникулашкахь а, дешаран хенахь а тайп-тайпана белхаш бо, царна тайп-тайпана кег-мерса хIуманаш ян Iамош.
Шайн юьртарчу маьждиган кертахь а, иштта кхийолчу меттигашкахь а синтарш дийгIина цо шен дешархошца цхьаьна. Иштта олхазаршна баннаш деш, уьш бIаьста хуьйцуш, гIуллакх а дина цара.
Султанан дешархоша йина хIуманаш районан гайтамашкахь хуьлу, дукха хьолахь хьалхара меттигаш йоху цара.
– Болх даггара бича, сиха карабоьрзу, дика ка а долу. Заводашкахь болх бинчул тIаьхьа сайна мел Iеминарг, тайп-тайпана механизмаш вовшахтийсар а, пхьола дар а, иштта кхидолу хIума а Iама луучунна дIадала лаам бара сан. Кхин дIогара даккхий хIуманаш ца Iамадахь а, кегийчарна ков-кертахь оьшу гIуллакх дан а, шайн дахарехь пайдехь хиндерг а Iамо аьтто хуьлу сан, – элира Султана тхоьца хиллачу шен къамелехь.
Хь.БАХТАЕВА
№107, шинара, 22 сентябрь, 2015 шо