Х1окху деношкахь Iаьрбийн вовшахтоьхначу Эмиратийн шейх Халифан цIарахчу фондан векалш Нохчийчохь хилира. Аэропортехь уьш тIелецира Нохчийн Республикин Правительствон Председателан заместитела – экономикин а, мохк кхиоран а, махлелоран а министра Магомадов Iабдуллас а, Регионан Правительствон жимачу бизнесан, предпринимательствон Комитетан председатела Шуаипов ШаIранис а.
Нохчийн Республикин Правительствон Председателан заместителан гIоьнчас Анзоров Анзора аьлла ма-хиллара, Халифан цIарахчу фондо республикин жима а, юккъера а бизнес кхиоран декъехь 50 млн. доллар юкъадиллина.
Билгалдаккха догIу, цара Соьлжа-ГIалин «Грозный Ситин» хьешацIийнан залехь дIаяьхьначу кхеташонехь белхан тоба кхолла сацам бина хилар а. Цара дийцарехь, Нохчийн Республикера ши векал говзалла лакхаяккха Абу-Дабе гIур ву. Цул тIаьхьа, уьш вайн республике юхабаьхкича болх дIаболор бу керла кхоьллинчу белхан тобано. Оцу гIуллакхо аьтто бийр бу жима а, юккъера а бизнес кхиорехь.
И.МАТАГОВ
№107, шинара, 22 сентябрь, 2015 шо