Шен 74-гIа мур дIаболо кечлуш ю Советски Союзан Турпалхочун Нурадилов Ханпашин цIарах йолу Нохчийн пачхьалкхан драмин театр. Аьхкенан садаIаран денош чекх а девлла, август баттахь шайн болх юха а дIаболийра театран актераша. 2015-чу шеран октябрь баттахь керла мур дIаболо дагахь бу уьш.
Цу дезачу денна лерина кечъеш керла спектакль ю. «Дайн кхерч» ю цуьнан цIе. Спектаклан бухе йиллина вевзачу гуьржийн яздархочун Иоселиани Отиан ши пьеса ю «Ворда харцале», «Ворда хаьрцинчул тIаьхьа». Нохчийчуьрчу хьовсархошна Отиа Иоселиани вевза дукха хан ю. Чекхдаьллачу ХХ-чу бIешеран 70-чу шерашкахь нохчийн къоман драматин театран сцени тIехь режиссера Хакишев Руслана хIоттийна, кхиамца чекхъяьлла яра цу авторан «Ворда харцале» цIе йолчу пьеси тIехь хIоттийна изза цIе йолу спектакль, коьртачу ролашкахь Россин Федерацин хьакъйолу артистка Хаджиева Нели, Нохч-ГIалгIайн халкъан артист Цицкиев Мохьмад волуш. Цул тIаьхьа. театран дехарца Иоселиани Отиас Казбеги Александран «Элисо» цIе йолчу дийцарна инсценировка йира. ТIаккха режиссера Хакишев Руслана и инсценировка бухе йиллина Iаламат тайна спектакль хIоттийра «Къемат де хIоьттича…» цIе йолуш. ХIХ-чу бIешеран юккъехь ямартлонца вайнах, дай баьхначу латта тIера лаамаза гIовттийна, Хонкаран махка дIахьовсорах яра и спектакль. Еххачу ханна хьовсархойн дегнашкахь лар юьтуш чекхъяьлла яра.
Къамелан юьххьехь вай билгал ма даккхара «Дайн кхерч» спектакль хIоттош, Иоселиани Отиан ши пьеса вовшахтоьхна режиссера Хакишев Руслана. Таханенан лазаме хаттарш ду хоьвсархойн кхиэле дахка кечдинарш. Кадечу замано дайн кхерчах херабаьхна кегийрхой, Iуналла дан стаг воцуш байлахь дисина юьртара латтанаш, хьаналчу къинхьегамах къехка жималла. Вайна дукхавезавеллачу Богверадзе Агабон роль кечъеш цхьабосса ши актер хир ву– Россин Федерацин хьакъволу артист Омаев Дагун, Нохчийн Республикин халкъан артист Азаев Хьамид. Кесарин васт кхоллар похIмечу шина актрисина тIе диллина. Царех цхьаъ ю, Нохчийн къоман театран исбаьхьаллин куьйгалхо, Нохчийн Республикин хьакъйолу гIуллакххо Ахмадова Хьава. Цуьнца рогIехь и роль ловзош хир ю Нохчийн Республикин хьакъйолу артистка Сатуева Марет. «Дайн кхерч» спектаклехь дакъалоцуш болчу актерийн сийлахьчу цIераша хIинцале дегайовхо кхуллу и спектакль халкъана, махкана мерза кхаъ хилла дIахIуттург хиларх.
А.АРАПХАНОВА
№109, шинара, 29 сентябрь, 2015 шо