Кегийрхойн денна лерина даздаран г1уллакхаш 1-чу октябрехь дуьйна дIадуьйлалуш ду Нохчийчохь. КIошташкахь, гIаланашкахь нохчийн эстрадан а, кIоштийн культурин цIенойн а солисташа дакъа а лоцуш, концерташ хуьлу
Цу денна лерина спортан тайп-тайпана къийсадаларш а дIахьо: шахматех ловзар, боксан а, футболан а турнираш, и.дI.кх.
Цул совнаха, Нохчийн Республикин кегийрхойн гIуллакхашкахула йолчу министерствос а, Нохчийн Республикин Правительствон туризмехула йолчу комитето а цхьаьна дIахьо «горга стоьлаш», конференцеш. Цига кхойкху махкахь бевзина ца Iаш, дуьненна а гIарабевлла Iилманчаш, говзанчаш, кхиберш. Цигахь дакъалоцуш хуьлу кхечу къаьмнийн векалш а. Цо аьтто бо кегийрхойн вовшашца а, кхечу къаьмнашца а йолу уьйраш чIагIъян.
Иштта, вайн махкахь ламаст хилла схьадогIуш ду Кегийрхойн денна лерина керл-керла гIишлош схьаеллар а: спорткомплексаш, культурин цIенош, кегийрхошна садаIа меттигаш. Иза дерриге а до Нохчийн Республикин Куьйгалхочун Кадыров Рамзанан куьйгаллица.
Оцу хьоло гойту, мехкан Iедалехь берш кегийрхой вайн къоман кхане хиларх кхеташ хилар. Тахана тIекхуьучу чкъурана бечу аьттонашка хьаьжжина хир ду муьлххачу а къоман кханалера де.
И.ИСЛАМОВ
№111, шот, 3 октябрь, 2015 шо