Кху деношкахь Нохчийн пачхьалкхан университетехь студенташца цхьаьнакхийтира Нохчийн Республикин Куьйгалхочун гIоьнча, Соьлжа-ГIалин къеда Хийтанаев Мохьмад.
Цо студенташна дийцира кегийрхошна юкъахь лазаме хилла лаьттачу наркоманех, цигаьрка озарх, харц хьехамах, кхечу г1уллакхех тешарх.
– Халахеташ делахь а, кегийрхой сиха Iехало. Наркоманис, могашалла талхочу кхечу хIуманаша шайна тIаьхьа доккха зулам дохьу. И наркомани санна даьржина ду вайн кегийрхошна юкъахь харц хьехамашка ладегIар, царах тешар. Кегийрхойн кхетамаш хIинца а кхиъна бац. Цундела уьш сиха Iехало, теша шайна хезначух. Баккъал а, ислам дин девза адамаш Iехалур дац харц хьехамаш бечаьрга, цундела динах лаьцнарг довза деза, – элира Хийтанаев Мохьмада.
Студенташа леррина ладуьйгIира М.Хийтанаевс бинчу хьехамашка. Вайн республикехь кегийрхошна юкъахь кхетош-кхиоран болх жигара дIахьош бу. И тайпа цхьаьнакхетарш вай лакхахь хьахийначу университетехь сих-сиха хуьлу.
З.ЛЕЧИЕВА
№112, шинара, 6 октябрь, 2015 шо