Кху деношкахь Нохчийн Республикин культурин министерствон Халкъан кхоллараллин туьшо Димаев Iумаран цIарахчу Хьалха-Мартан районан культурин цIийнехь дIаяьхьира ламаст хилла дIахIоьттина йолу «Нохчийн пондар» хIорашеран регионашна юкъара фестиваль. 
ТIекхуьу кегийрхой къоман культурах хер ца балийтаран а, I.Димаевн мукъамаш бовзийтаран а Iалашонца дIахьош ю иза. ХIора шарахь санна, луларчу регионашкара хьеший бара фестивале баьхкина. Ткъа уггаре а лараме хьаша Димаев Iумаран кIентан йоI Димаева Элита яра.
Фестиваль дIайолош I.Димаевн кхоллараллех лаьцна видеоролик гайтира. Цул тIаьхьа вистхилира Хьалха-Мартан районан администрацин куьйгалхо А.Алаудинов а, Халкъан кхоллараллин туьшан директор Р.Даудов а. Ткъа Димаев Iумаран доттагI хиллачу Цегаев Мадас а, Iумара Iамийначу Паскаев Рамзана а шайн сирлачу дагалецамашца хьовсархошна вовзийтира Нохчийн похIме пондарча.
Фестивалан дакъалацархоша I.Димаевс даьхна дуккха а мукъамаш элира. Хьовсархоша боккхачу лаамца, безамца ладуьйгIира цаьрга. Мукъамийн мах хадош, толаман меттигаш билгалъехира жюрин декъашхоша: Нохчийн Республикин а, ГIалгIайчоьнан а халкъан артиста Паскаев Рамзана, Нохчийн Республикин а, ГIалгIайчоьнан а халкъан артиста, жюрин председатела Сагаипов Iумара, Хьалха-Мартан районерчу пондарчас Цегаев Мадас.
Хьалхара меттиг яьккхира: Меликова Светланас (Къилбаседа ХIирийчоь – Алани), шолгIа меттиг – Ф.Кудусовс (Курчалойн район), кхоалгIа меттиг – Ахмедов Салмана (Грозненски район).
Фестивалан толамхошна I-ра, II-гIа, III-гIа даржан дипломашца а, кубкашца а совгIаташ дира.
Мехала цхьаьнакхетар дерзош жюрин декъашхоша нохчийн ширачу пондар тIехь I.Димаевн мукъамаш элира .
З.САГАЕВА
№113, еара, 8 октябрь, 2015 шо