ХІокху деношкахь боккха иэшам хилла нохчийн 1илманан – еххачу хенахь хала цамгар текхначул тІаьхьа кхелхина Алироев ИбрахІим, филологин а, историн а Іилманийн доктор, профессор, Нохчийн Республикин Іилманийн академин декъашхо-корреспондент, Россин Федерацин Іилманан хьакъволу деятель.
Алироев ИбрахIим вина 1934-чу шеран сентябрь беттан 4-чу дийнахь Къилбаседа ХIирийчуьрчу Мозлакхехь. Дешна ГIиргIизойн пачхьалкхан университетан филологин факультетехь (шен халкъаца цхьаьна махках ваьккхинчохь). 1958-чу шарахь, Нохч-ГIалгIайн пачхьалкхан хьехархойн институтехь хьехархо волуш дIаболабо хьехархочун-Iилманчин болх. 1972-чу шарахь дуьйна еххачу хенахь юкъарчу меттан кафедрин (кафедра общего языкознания) куьйгалхо лаьтта. 1962-чу шарахь Гуьржийн Iилманийн академехь чIагIйо филологин Iилманийн кандидатан диссертаци, 1972-чу шарахь филологин Iилманийн доктор хуьлу, 1993-чу шарахь Россин Iилманийн академин Этнографин институтехь чIагIйо историн Iилманийн докторан диссертаци. Кхиаме хилла цо Iилманан хьаьрмахь къахьегар – бIе сов Iилманан белхан автор ву иза, шайна юкъахь 20 сов маьIне монографи а йолуш. («Очерки этнографии чеченцев и ингушей», «Язык, история и культура вайнахов», «Становление и развитие вайнахских языков», «Кистинский диалект чеченского языка», иштта кхин а). И.Алироевс дукха болх бина къона Iилманчаш кхиорехь а. Цо кечвина филологин Iилманийн 3 доктор, 15 кандидат.
Шен дерриге а дахар нохчийн Іилма а, нохчийн Іилманчаш а кхиорна дІаделла ИбрахІима. Іилманан гуонашлахь иза вевзара билггал а похІме Іилманча а, Іилманан дика вовшахтохархо а санна.
Шен къоман а, мехкан а дуьхьа хьанал вацаран масал хилла ваьхна, адамашца ваза хууш, оьзда, догцІена стаг санна вуьсур ву иза тхан дегнашкахь.
Дала гечдойла цунна, Дала диканца бекхам бойла нохчийн Іилма кхиорехь цо хьегначу къинна.
Накъостийн тоба
Кадам
Нохчийн Республикин Іилманийн академин президиумо даггара халахетарца кадам бо филологин а, историн а Іилманийн доктор, профессор, Нохчийн Республикин Іилманийн академин декъашхо-корреспондент Алироев Ибрах1им кхалхарца доьзна цуьнан доьзале а, гергарчаьрга а.
Дала гечдойла цунна, Дала ийман долу собар лойла шуна а, халахетаран дакъа мел долчунна а.
Нохчийн Республикин Іилманийн академин президиум
«Даймохк» газетан редакцин коллективо халахетарца кадам бо Нохчийн Республикин Іиманийн академин декъашхо-корреспондент Россин Федерацин Іилманан хьакъволу деятель, филологин а, историн а Іилманийн доктор Алироев ИбрахІим кхалхарца доьзна цуьнан доьзале а, гергарчарга а.
Дала гечдойла цунна, Дала ийман долу собар лойла шуна а, халахетаран дакъа мел кхаьчначунна а.
«Даймохк» газетан редакцин коллектив