Нохчийн Республикин Куьйгалхойчун Кадыров Рамзанан тIедилларца Иваново гIалахь дIаяьхьначу къаьмнийн культурийн ХХ-чу фестивалехь дакъалецира Нохчийчоьнан къоман политикин, арахьарчу зIенийн, зорбанан, хаамийн министра Умаров Джамбулата. Фестиваль дIахьочу хенахь нохч-гIалгIайн культурин суьйре хилира. Цигахь дакъа а лецира, чулацаме къамел а дира Д.Умаровс.
Цо аьлла ма-хиллара, муьлххачу а къоман культура шен башхалла, исбаьхьалла йолуш ю. Шен къоман гIиллакхаш, ламасташ, Iадаташ довза деза хIора стагана. Иштта хIора стаг а ша мичара схьаваьлла, шен бух мичахь бу хууш хила веза.
Министрана хетарехь, къаьмнийн культураш кхерамехь ю. Уггаре а хьалха иза хьаштхойн юкъараллин амалтхо хиларна кхерам болуш ю. Хьал-бахамна тIаьхьа ваьллачунна культурин мехаллин хьакъ боллу мах бевзар бац.
– Вай юкъаралла кхето еза культура ца хилча, иза дIаяьлча вайн кхетам галбериг хиларх, вайгахь хьаштхочун кхетам кхоллалург хиларх. Ларамаза ма дац «Россин Федерацин 2020-гIа шо кхаччалц йолчу къоман кхерамазаллин стратегехь» культурина болчу уггаре а коьртачу кхерамна юкъахь цIе яьккхинарг «кхетам боцчу чкъурана синхьашташ кхочушдарна лерина культурин шуьйра продукци юкъаяржор» лоруш хилар, – билгалдаьккхира министра.
Д.Умаровс чIагIдеш ма-хиллара, Нохчийн Республикин Куьйгалхочо Кадыров Рамзана шен лерринчу тергонехь латтош ду дуккха а къаьмнех лаьтташ йолчу Нохчийчоьнан юкъаралла ийманехь кхетош-кхиоран гIуллакхаш. Цо Iедалан органашкара, дешначу нахера лоьху адамийн синош, ойланаш цIанъярна тIехьажийна болх бар. Цаьргахь адамалла, собар кхиор. Иза ларамаза а дац.
Дуьненахь а, махкахь а хуьлуш болчу а, хиллачу а политикин а, экономикин а хиламаша боккха Iаткъам бина адамийн кхетамашна, ойланашна, хьежамашна, Сепаратизм а, терроризм а, экстремизм а кхоллаелла. Оцу дерригенца а цхьаьна къийсам дIабахьа беза массара а. «Вай дерриге а цхьана бакъдолчух кхета деза: халкъийн цхьаалла, уьш вовшех кхеташ хилар, уьш вовшийн лоруш хилар Iаламат боккха ницкъ бу. Вайн барт бу. Вай цхьаъ ду. Вай цхьаьна ду. Цундела вай тахана ницкъ болуш а ду, цхьаьнгга а эшалур долуш а дац», – бохура Умаров Джамбулата.
И бакъдерг адамашка дIакхачор, Россин пачхьалкхан цхьаалла чIагIъяр, Iалашъяр шен дахаран коьрта къилба лору Нохчийн Республикин Куьйгалхочо Кадыров Рамзана.
С.ХАМЗАТОВ
№121, эсаран беттан 29-гIа де, 2015 шо