Нохчийн Республикин Куьйгалхочун, Правительствон Администрацин динан а, юкъараллин а организацешца зIенаш латторан департаментан куьйгалхоша а, говзанчаша а денна ала мегар долуш цхьаьнакхетарш дIахьо регионерчу министерствийн, ведомствийн, предприятийн, организацийн, учрежденийн коллективашкахь. Цигахь дийцаре до, коьртачу декъана, къона тIаьхье ийманехь, оьзда, гIиллакхе, эхь-бехк долуш, Даймахке безам болуш кхетош-кхиоран хьокъехь долу гIуллакхаш.
Иштта, масех де хьалха департаментан директор Дадаев Ризван цхьаьнакхийтира экономика а, мохк а кхиоран, махлелоран министертвон куьйгалхошца а, говзанчашца а. Царна хьалха къамел дечу хенахь Р.Дадаевс дийцира Нохчийчоьнан къона тIаьхье ийманехь кхетош-кхоран Цхьааллин Концепци кхочушъяран декъехь бечу балхо лелочу мехалчу маьIнех лаьцна. Оцу белхан мехалла къаьсттина лакхайолу экстремизман а, терроризман а идеологашна дуьхьал дIахьош болу къийсам жигарабаьккхинчу хIокху муьрехь. Цо аьлла ма-хиллара, хIинца а сацийна дац оцу идеологаша кегийрхой, харц хьехамаш барца, Iехош террористийн гIеранашна юкъаийзор. Цо вайгара лоьху жоьпалла кхин а лакхадаккхарца къахьегар.
Цуьнца цхьаьна вайн халкъан сагатдеш болчу лазамех цхьаъ бу кегийрхой наркотикашка марзбалар. Къонанаш ийманехь, оьзда, гIиллакхе кхиоран коьрта жоьпалла дай-наношна тIехь ду. Цундела цара шайгара дика масал а гойтуш Iамо деза шайн бераш. Дена-нанна хаа деза шен хIусамера араваьлла кIант а, йоI а хIун лелош ду, уьш муьлххачу некъашца лелаш бу, цара доттагIалла хьаьнца леладо, церан уьйр-марзонаш хьаьнца ю, царна дезарг, цара пебеттарг хIун ду. «Иза а хууш, хаддаза царна тIехь терго латтош хилча бен вайга къонанаш ларлур бац экстремистийн боламийн тIеIаткъамах наркотикашка, корта бахош долчу молханашка марзбаларх»,– бохура Дадаев Ризвана. Цо дийцарехь, чIогIа мехала ду дас-нанас шаьш шайн доьзалшна дош хетийтар, церан шайга сий-ларам хилийтар. Ткъа и мехаллаш берашкахь царна мотт Iама болабале дуьйна кхион еза. ТIаккха царах дай-наношна накъостий, гIортораш хир ю, юьртана а, махкана а хьалха юьхькIам хир бу.
Цхьаьнакхетар дерзош министерствон куьйгалхоша Дадаев Ризванан баркалла элира чулацаме, хьикмате къамел дарна а, шаьш долчу варна а. Цуьнга юха а кхуза вар а дийхира цара.
Д.ПАШАЕВ
№122, шот, эсаран беттан 31-гIа де, 2015 шо